Районда “Парклар маршы” игьлан ителде

Ильнур, 8 апрель 2014 - 06:54

2782

Яз җиттеме күңел табигатькә тарта да тора инде. Билгеле, аның сәбәпләре дә җитәрлек инде. Көннәр матурлана.

Яшеллек әзрәк күзгә күренә башлауга табигатебезнең чисталыгы турында кайгырта башлыйбыз. Районыбызда бу уңайдан төрле акцияләр старт ала. Шундыйларның иң зурысы дип мин "Парклар маршы" акциясен атар идем.

Районыбызда инде бу акция Татарстан урман хуҗалыгы министрлыгының махсус карары нигезендә 24 мартттан ук башланып киткән икән. Ул 23 майга кадәр дәвам итәчәк.

"Мәктәпләребез бу эшкә күптән алынды инде,"-дип каршыладылар мине "Балтач" тыюлыгы җитәкчеләре. Табигатебез кар-сулардан арынганчы укучыларыбыз иҗади бәйгегә бердәм булып алынганнар. Берәүләре сыерчык оясы ясый, икенчеләре рәсем ясый, өченчеләре инша,шигырьләр яза икән. Әле дә хәтеремдә, аның беренче йомгаклау конференциясен 2002 елда Кече Лызи мәктәбендә уздырдык. Ул вакытта 38 укучы катнашкан иде.

Еллар уза торды, акция дә елдан-ел киңрәк колач алды.Инде бүгенге көндә бу акциядә катнашучылар саны 10 меңгә якынлашып килә. "Ел саен балалардан конкурска 500 дән артык иҗади эш кабул итеп алабыз,"-ди тыюлык җитәкчесе Альберт Фәрхетдинов. "Берсеннән-берсе матур эшләрнең кайсын сайлап алырга белми аптырыйбыз. Узган ел 88 кешегә бүләк тапшырдык",-дип сүзгә кушыла инспектор Рамил Хаҗиев. Эшләр конкурс белән генә тәмамланмый анысы.

Ике айлык хезмәт десанты вакытында Җир-Анабыз купме чүп-чардан арына, яшелләнә, купшылана. Инде бу эшләрдә балаларыбыз гына түгел, өлкәннәребез дә актив катнашырлар дигән теләктә калабыз. Амин, шулай булсын!