Президент Балтач игенчеләре хезмәтеннән кәнәгать калды

Вертолет белән очканда, игенчеләрнеӊ эшләрен бәяләп була, кырлар матур күренә, диде ул. Президентны районда эшләр барышы белән Балтач районы башлыгы Рамил Нотфуллин таныштырды. Игенчеләр 3-4 көннән чәчүне тәмамларга мөмкиннәр, хәзер инде көндәлек 3 меӊ гектар мәйданда чәчү эшләре алып барылганын әйтеп, кукуруз һәм рапс культураларын орлыкка игүне алгы планга куюны күрсәтеп узды. Терлекчелек тармагыныӊ тотрыклы эшләве Президентка охшады, ул бу юнәлештә сөтнеӊ, бигрәк тә шәхси хуҗалыктан җыелганына бәясен төшермәүнеӊ әһәмиятле икәненә басым ясады.

Ил башлыгына сораулар да күбәйгән: Бөрбаш җирле үзидарә башлыгы Сәйдәш Хәкимов үзарасалым акчасын вакытында тотудагы киртәләр турында әйтте һәм бу өлкәдә эшләрне вакытында башкару өчен тәкъдимнәрен дә кертте. «Агрохимсервис» җитәкчесе Наил Гыйлаҗев төрле конкурс, тендерлар уздырганда «беркөнлек фирмалар» катнашып, бу эшнеӊ әһәмиятен юкка чыгара, дип белдерде. Шеӊшеӊәр авыл җирлеге башлыгы Раузит Галиев исә Шеӊшеӊәрдә урнашкан спорт корылмасы ремонты өчен финанс ярдәме сорады. Азрак сораганы соӊрак исенә төшеп, аныӊ җитмәвен исбатларга тырышса да, Президент беренче соралган акча биреләчәк, калганы үзегездән булачак, дип искәртте.