Арбор балаларны шатландырды
«Аллага шөкер, ярыш уздырам дип бер сызгыру җитә, теләк белдерүчеләр «эх» дигәнче килеп тә җитә, - дип горурланып сөйләде бу килүебездә Арбор авылын үзенең көрәшчеләре белән таныткан Татарстанның атказанган тренеры Дамир Гобәйдуллин.
- «Шәһри Казан» газетасы редакциясе барлык чемпионнарны ярты елга бушлай подписка белән бүләкләгән. Монысы өчен без авылдашыбыз, газета журналисты Зөлфия Хәлиуллинага рәхмәтле. Һәр ярыш саен бер сюрприз әзерли инде ул безгә. Бар өметебезне аклап баручы чемпионыбыз Булатның әтисе Харис та ярыш саен үз бүләген куя. Татарстанның атказанган спорт остасы, билбау көрәше буенча дөнья чемпионы Айдар Хәйретдинов та бүләксез кайтмый ярышларга. Хәер, барысы да үзегезнең күз алдында инде». Билгеле, бу вакытта инде «Арбор» җәмгыяте директоры Хәмит Баязитовны оныту безнең өчен зур гөнаһ булыр иде. Фәкать аның фидакарьлеге, тырышлыгы, кешелеклелеге нәтиҗәсендә генә без күпме баланы сөендерәбез, алар күңелендә матур тойгылар уятабыз. 1996- 98нче елгы яшьләр арасында барган бу ярышлар да үз югарылыгында узды. «8 баламның 7се призер булды», - дип канатланып кайтып китте Шеңшеңәрдән тренерыбыз Альберт Миннеханов. Беренчелекне үзләрендә калдырган келәм хуҗаларына да, икенче-өченче урыннарны яулаган Чепья, Норма егетләренә дә канатлар үсте бу көнне. Харис абыйлары бүләкләренә лаек булган Рафил Вафин белән Әмир Хәйруллинның ничек шатланганын күрсәгез иде! Айдар Хәйретдинов үз бүләген остазы Дамир әфәндегә тапшырды. Танылган тренер хуҗалык җитәкчесе белән бергә район көрәш федерациясенең күкрәк билгесенә дә лаек булды.
Чемпионнарыбыз белән таныш булыйк: Рафил Вафин (Норма, 32 кг.), Максим Прокопьев (Чепья, 36 кг.), Ринас Шәрифуллин (Шеңшеңәр, 40 кг.), Әмир Хәйруллин (Арбор, 43 кг.), Булат Һадиев (Арбор, 46 кг.), Айнур Галләмов (Арбор, 50 кг.), Илназ Минмуллин (Чепья, 55 кг.), Расил Сабирҗанов (Норма, 60 кг.), Дилүс Рамаза-нов (Түнтәр, 65 кг.), Рәлиф Галиев (Смәел, 70 кг.), Радик Габдуллин (Шеңшеңәр, авыр үлчәүдә).
