Айрат безнең белән
Кыска гына гомере эчендә гер спортын да, татарча көрәшен дә, кул көрәшен дә сынап караган, шулай да кул көрәшен аеруча үз итеп, шушы төр буенча Россиянең спорт остасы исеменә лаек булган Салавыч авылы егете Айрат Котдус улы Зиятдиновны дуслары быел да онытмады.
Яшьлек дусты, бүгенге көндә Балтач районара юл төзелеше идарәсендә мастер хезмәтен башкаручы Азат Борһанов тырышлыгы белән Салавыч мәдәният йортында аның истәлегенә өченче мәртәбә кул көрәше ярышлары оештырылды. Балтач район спорт бүлеге башлыгы Р.Заһидуллин, бүлекнең элеккеге башлыгы Р.Борһанов, Айратның әнисе Нурия ханым, «Хыял» яшьләр үзәге директоры И.Гайнетдинов чыгышларыннан соң, ярышларга килүчеләр мәрхүмне бер минут тынлык белән искә алдылар. Шуннан соң сәхнәдә ярышлар башланып китте. Узган еллардан аермалы буларак, быелгы ярышларга спортчыларның күпләп килүе аның популярлаша баруын сөйли.
Хатын-кызлар арасында җиңүчеләр: Гөлзия Гарифуллина (70 кг.), Әлфия Зиятдинова (80 кг.), Фәйрүзә Әхмәтшина (80 кг.нан югары) - өчесе дә Балтач җирлегеннән.
Ир-егетләребез арасында: Фирзәр Нигамәтҗанов (Салавыч, 65 кг.), Ранил Гыйззәтуллин (Шеңшеңәр, 80 кг.), Фаил Шакиров (Субаш, 90 кг.), Фәннур Зәкиев (Шеңшеңәр, югары үлчәүдә). Ярышларның абсолют батыры Шеңшеңәрдән янә Ранил Гыйззәтуллин булды.
Команда беренчелегендә призлы урыннарны Балтач шәһәр җирлеге, Шеңшеңәр авыл җирлеге, «Игенче» җәмгыяте спортчылары бүлеште. Ярышларда беренче өч урынны яулаучылар Азат бүләкләренә лаек булса, дүртенче урындагыларны Нурия ханым бүләкләде.
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Иң мөһим һәм кызыклы язмаларны Татмедиа Telegram-каналында укыгыз
