Балтач киләчәктә шахматта шаккаттырачак (фото)

Киләчәктә бу спорт төрендә тагы да зур уӊышларга ирешербез әле дигән ышаныч бар. Нигә дигәндә, зур өметлар баглый торган кечкенә яшь шахматчыларыбыз һәм шашка уйнаучыларыбыз Татарстанда билгеле уенчылар. Менә бүген дә 6 яшьлек Дилә Закирова шахмат буенча Татарстан беренчелегендә катнашырга китте. Дилә Балтач бистәсендә яши, икенче номерлы балалар бакчасында тәрбияләнә. Гади шашка, 100 шакмаклы тактада уйный торган шашка һәм шахмат уеннарын бик ярата. Гадәттә өйдә әтисе, абыйсы белән шөгельләнә. Дилә әле күптән түгел Яшел Үзән шәһәрендә уздырылган регионара шахмат турнирында үзеннән зурлар белән ярышып, беренче урынны алган иде. Татарстан беренчелегендә дә бирешмәс, дип уйлыйбыз һәм аӊа зур уӊышлар телибез!