Балтачлылар — дүртенче

Минзәлә шәһәрендә узган VIII җәйге «Авыл яшьләре» уеннарыннан командабыз зур җиңүләр белән кайткан. Бигрәк тә беренче урынны яулап, үзләренең олы җиңүләре белән бадминтончыларыбыз, туристларыбыз куандырган. Туристларыбызга 6 ел рәттән республикабызда тиңнәр юк икән. Механизаторларыбыз да кимен куймаган. Бөрбаштан Алмаз Корбангалиев, Бөрбаш Сәрдегәненнән Финзия Закирова үзләрен чын тракторчы икәнлекләрен күрсәткәннәр. Шәхси беренчелектә дә, команда зачетында да икенче булганнар. Герчеләребез дә сынатмаган. Районыбызны бөтендөньяга танытып килгән Шеңшеңәрдән Рамил Зарипов - өченче, РСФСРның спорт остасы Тәбрис Йосыпов соңгы вакытта даими шөгыльләнмәгән хәлдә дә дүртенче урынны алуга ирешкән. 32 килограммлы герне 214 мәртәбә этәреп, дөнья чемпионнарын да шаккатырган. Шеңшеңәрдән Ләйсән Гайфиева да герләрне уйнатып кына торган.

«Моңарчы җиңел атлетика буенча 20нче урыннан алга китә алган юк иде», дип дәвам итте сөйләвен Рөстәм Рафисович. Быел исә, өченче булдылар. Шахматчыларыбыздан Ландыш Гарифуллина бөтен партиядә дә җиңүгә ирешкән. Салават Габдрахманов та аннан азга гына калышып, командабызны бишенче урынга чыгарган. Сыер савучы егетләребез алтынчы урынны яулаганнар. Ярышларның тагын бер мизгеле райондашларыбызның күңелендә озак сакланыр. Уеннарның флагын күтәрүчеләр арасында узган елгы Россия уеннарының җиңүчесе Рөстәм Рафисовичның үзе булуы. Ә менә бер көрәшчебезнең командабыз мәнфәгатьләрен санга сукмыйча ярышларны ташлап кайтып китүе кызганыч. Бу - командабызның гомуми нәтиҗәләр зачетында мамадышлыларны өченче урынга күтәреп, дүртенче урынга тәгәрәвенә китерде. Алай да калган егетләребез сынатмаган. 70 кг үлчәү авырлыгында Илдар Зарипов - чемпион. 90 кг үлчәү авырлыгында Ранил Сафиуллин өченче булган.
Сөйләште Нурзада СӘМИГУЛЛИН.