Булдырдың, Рәлиф! (фото)

Районыбызда соңгы вакытта чаңгы спортына халык арасында да игьтибар артты диясе килә. Әз генә буш вакытлары булдымы, "Сабантуй" паркына ашыгалар. Әнә шундый оешканлык белән ел да СССРның спорт остасы Рәлиф Әскаров призларына ярышларыбыз узып китте. Аның быелгысын бигрәк тә көтеп алды балалар. Көтмичә, остазлары аларга бу көнне, күрше-тирә район балалары белән көч сынашырга мөмкинлек бирә. Ярышлар тәмамлангач, ул аларның муеннарына төрле дәрәҗәдәге медальләр элә, үзенең акчалата бүләкләрен тапшыра, аннан соң барысын ашханәгә алып кайтып, тормыш иптәше Ризәлә пешергән бәлеш белән сыйлый.

Аллаһыга шөкер, дусларым ташламый. Алмаз Исрафилов, Раиф Гафиуллин, Глеб Давлеков, Рифат Зарипов һәрчак хәлемне белеп, ярдәм кулы сузып торалар. Менә бүгенге ярышларга да аларның өлеше күп керде. Рәхмәт, гимназия коллективына да, - дип шатлыклары белән уртаклашты Рәлиф.

Ярышларыбызга килсәк, бик матур узды алар. Көне дә менә дигән булды. Чаңгычыларыбыз спорт мәктәбе филиалларыннан гына булса да, аларның саны 98 гә җитте. Инде чемпионнарыбыз белән таныштырып узам. 1999-2000 елгылар арасында Кече Лызидан һәм гимназиядән Анастасия Исаева, Ренат Гафиуллин, 2001-2002 елгылар арасында Чепьядан һәм гимназиядән Ульяна Кумаева, Рәйхан Газыймов, 2003-2004 елгылар арасында гимназиядән Зәйнәп Нигьмәтҗанова, Аяз Исрафилов, 2005-2006 елгылар арасында Арчадан һәм Балтачтан Алия Диярова, Илназ Кәбиров, 2007 елда һәм аннан соңгы елларда туганнар арасында гимназиядән Алия Исрафилова, Данияр Хафизов чемпион булып танылды. Һәр ярышта беренчелекне бирмәгән Рәйхан Газыймов өчен бу ярышлар икеләтә куанычлы булды. Бабасы - Илшат Хәкимов оныгына чаңгычылар өчен махсус чыгарылган кул сәгате бүләк итте.