«Чемпион» ишекләрен ачты

Спортзал ике ел эшчәнлеген туктатып торганнан соң кабат ишекләрен ачты. «Строймастер» җәмгыяте спортзалга икенче тормыш бүләк итте дисәк һич арттыру булмас. Биредә ике программа нигезендә реконструкция һәм ремонт эшләре башкарылып, тәрәзәләр һәм ишекләр алыштырылган, түбә, фасад ремонтланган, тышкы төзекләндерү эшләре башкарылган, юлларга асфальт салынган, брусчатка җәелгән.

Спортзалны ачу тантанасында Рамил Рәшитович катнашучыларны әлеге истәлекле вакыйга белән чын күңелдән котлап, залны төзекләндерүгә хезмәте кергәннәргә рәхмәт белдерде. Илдар Ирек улы исеменнән дә барлык катнашучылар адресына җылы теләкләр һәм котлау сүзләре яңгырады.

Спортзалда хәзер волейбол, баскетбол, мини футбол, туризм белән шөгыльләнергә була. Чаңгычылар өчен дә инвентарьлар булдырылган.

– Әлеге вакыйганы түземсезлек белән көттек. Ниһаять, спорт белән шөгыльләнергә үз урыныбыз бар, – дип куанычлары белән уртаклашты авыл яшьләре ачылу тантанасында.