Егетләр карт машиналарында җилдереп, карны да эреттеләр (фото)

Ватанны саклаучылар көне уңаеннан оештырылган чарага үзебезнең егетләрдән тыш Лаеш, Арча, Кукмарадан да килгәннәр иде. 22 катнашучы "Стриж", "125", "Хонда-200" карт машиналарында өч заезда көч сынашты. Кечкенә генә малайларның җиңүгә омтылышлары шаккатырырлык. Бер-берсен узу максатыннан "обгон"га чыгулары, көндәшләренең юлларын кистерүләре, финиш сызыгын үткәч җиңү сөенеченнән кулларның канатлардай күккә таба күтәрелүләре... Ә җиңелүчеләребез күрсәтми генә күз яшьләрен дә сөртеп, уңышсызлыкларының сәбәпләрен эзләргә теләде.
- Абый, булмады бит, - дип килде бер малай остазы янына.
- Булырга әйткәнне тыңламадың бит...
- Беренче скоростька кермәде бит ...
- Кермәсә, беренчесе сиңа кирәк тә түгел, өчкә я дүрткә тык дидем бит.

Малай аптырап карап торды да, китеп барды. Аллаһы боерса икенче елга бәхет елмаер әле үзенә.

Инде финиш сызыгын үтеп кергән машиналар янына тамашачылар да җыелып, картларны өйрәнделәр. Бәяләрен дә сөйләшми калмадылар. Кемнәрдер ярыштан тыш та йөреп карау мөмкинлегенә лаек булды.

"Хыял" яшьләр үзәгенең дәртле музыкасы астында кайнар чәй һәм тәмле коймактан авыз итеп, кояшның назлы нурлары астында җиңүчеләрне бүләкләү мизгелләрен көттек. Район ЮХИДИ бүлеге җитәкчесе Рафил Шәймөхәммәтов һәм ДОСААФ оешмасы җитәкчесе Рафил Фәйзрахманов һәрбер катнашучының кулын кысып грамота тапшырдылар, ә җиңүчеләр медаль һәм саллы бүләкләргә лаек булдылар.

Ә хәзер җиңүчеләр белән дә танышып узыйк:

I урын - Ислам Хәйруллин (Балтач ДОСААФ)
II урын - Илсаф Ибраһимов (Кукмара)
III урын - Никита Михайлов (Кукмара)

I урын - Айзат Садыйков (Кукмара)
II урын - Динар Хөснетдинов (ДОСААФ)
III урын - Ильяс Сабирҗанов (ДОСААФ)

I урын - Илназ Галимов (ЦВР)
II урын - Кәрим Һадыев (ЦВР)
III урын - Ярослав Ватомов (Лаеш).

Ярыш башланганчы мәйданчыкта кыш, юлларда ап-ак кар иде. Ә инде җиңүчеләрне бүләкләгән минутларда яз үзенең назлы карашы белән күңелләрне җылытып, карларны эретергә өлгерде. Гүя ул да шундый шатлыклы чарага ихластан куанып, балаларның сөенечен уртаклашты.