Хоккей турнирлары

Реклама

Шушы авыл җирлегенең күренекле шәхесләре, шәхси эшмәкәрләре инициативасы белән Норма урта мәктәбенең хоккей мәйданчыгында инде икенче елын ярышлар үткәрелеп, традициягә әверелеп бара. Моңа былтыр мәктәпкә хоккей коробкасы кайтарылу да зур сәбәп һәм этәргеч булып тора.
2-Знче гыйнвар көннәрендә, озакка сузылган ялларны мәгънәле итеп уздыру максатыннан, Радик Шәрифҗанов тырышлыгы белән Норма урта мәктәбендә озак еллар завуч булып эшләгән һәм физик тәрбия сәгатьләреннән белем биргән мәгариф ветераны Фәрит ага Кәлимуллин хөрмәтенә ярышлар уздырылды. Ярышларда Норма авылы җирлегеннән 5 команда көч сынашты.
21- 22нче гыйнвар көннәрендә хәзерге вакытта Казанда яшәүче Илшат Шакиров үткәргән ярышлар да зур оешканлык белән узды. Уенда Чапшар, Пүскән авыллары, Норма урта мәктәбе, шулай ук Норманың «Химик», «Студентлар» һәм «Интер» Казанда эшләүче якташ егетләребез командалары катнашты.
Чираттагы ярыш исә Кариле авылыннан шәхси эшмәкәр Тәлгать Газизов призына үтәчәк. Тәлгать әфәнде хоккей ярышларын үткәрүдә башлап йөрүче һәм оештыруда активлык күрсәтүче иганәче дә әле ул.
Сәламәт яшәү рәвешен пропагандалауда фидакарь хезмәтләре, спортка карата халык күңелендә мәхәббәт уята алганнары өчен Норма авыл җирлегеннән чыккан әлеге ир-егетләргә һәм авыл җирлеге җитәкчелегенә олы рәхмәт хисләре ирештерәсе килә.