Җиңмичә кайтмыйбыз

Ильнур, 22 ноябрь 2013 - 05:31

2431

Татарча көрәш. Лаешта республика тарихында беренче мәртәбә 1992-1994нче елларда туган яшьләр арасында узган Татарстан беренчелегендә 85 килограмм үлчәү авырлыгында бил алышып, Арбор егете Салават Әсхәдуллин чемпион исемен яулады.

Шушы ук үлчәүдә Яңгулдан Руслан Рәфыйков Казанның Идел буе районы өчен бил алышып, икенче булды. Мамадыш районының Түбән Ушма авылында авылдашлары РСФСРның спорт остасы Рафаэль Мөхәммәтшин истәлегенә 1993-1995, 1998-2000нче елда туган балалар арасында оештырылган ярышлардан Чепьядан Илназ Минмуллин - беренче, Арбордан Фәнис Кәбиров икенче урын белән кайттылар.

Казан шәһәрендә 1997-1998нче елгы яшьләр арасында узган Рәсәй беренчелегендә бил алышып, Нөнәгәр урта мәктәбенең 11 сыйныф укучысы Рәдис Сәмигуллин Рәсәй чемпионы исемен яулады. Даими рәвештә Малмыждан менеп Яңгулда Ранил Габдрахманов кул астында шөгыльләнеп, күп тапкырлар район чемпионы булган Айрат Хәйруллин бу юлы Киров өлкәсе өчен көрәшеп икенче булды.

Спорт туризмы. Мари Иленең Сернур районы Марисола авылында Мари Иленең ачык беренчелегендә безнең спорт мәктәбе тренеры Азат Хөснетдинов кул астында шөгыльләнүче Субаш укучылары көч сынашып кайттылар. Шәхси беренчелеккә узган бу ярышларда Илсур Вафин икенче призлы урынны алды.

Мини-футбол. Спорт мәктәбе тренеры Ильяс Галимуллин кул астында шөгыльләнүче 1997- 1998нче елгы укучылар арасында Биектауда, 1999-2000нче елгылар арасында Балык Бистәсендә узган зона ярышларында икенче урыннарны яулап, Бөгелмә һәм Болгар шәһәрләрендә узачак Татарстан беренчелегенә путевка алдылар. Теләчедә 2001-2002нче елгы балалар арасында узган ярышларда алар өченче булдылар.

Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Твиттер, Яндекс.Дзен