«Факел» яшүсмерләр клубы бинасында оештырылган картинг клубта 20 бала шөгыльләнә.
Үз эшенең остасы булган тренер Фәнис Хәйруллин республика күләмендә үткән һәр ярышта катнашырга омтыла. Әлеге зур хезмәткә ТР Юл хәрәкәте иминлеге фәнни һәм мәгариф программаларын финанслау дирекциясеннән тыш, шәхси эшмәкәр Илдар Галиуллин һәм «ОСТО»(җитәкчесе Рафаэль Фәйзрахманов) матди ярдәм күрсәтә. Күптән түгел райондаш картчыларыбыз «Форсаж» картинг үзәгендә уздырылган ярышта булып кайтты. «Факел» яшүсмерләр клубы - 15, ә «ОСТО» командасы унынчы урын яулауга иреште. Шәхси беренчелектә Шамил Кадыйров беренче булды һәм диплом, медаль, кубок, акчалата приз белән бүләкләнде. Искәндәр Нотфуллин исә сигезенче, аңа диплом һәм акчалата приз тапшырылды. Киләчәктә егетләрне бихисап ярышлар көтә, ә без аларга һәрвакыт уңышлар юлдаш булуын телибез.
Рәсемдә: (сулдан уңга) Шамил Кадыйров һәм Искәндәр Нотфуллин.
