“Каймак” тавыннан утлар чыкты

Ильнур, 1 февраль 2016 - 17:16

2515

Кышкы уеннарның нинди генә төре юк хәзер. Кичә - 31 гыйнварда бистәнең Кече Лызи авылы ягына китә торган юл буенда урнашкан "Каймак" кибете каршындагы кар тавында көн дәвамында музыка һәм балаларың шат авазларыннан яңгырап торды.

Район яшьләр эшләре һәм спорт бүлеге хезмәткәрләре биредә тау шуу ярышы уздырдылар. Әлеге ясалма таучык кыш башында "Арча" җәмгыятенең Балтач сөт-май комбинаты коллективы тырышлыгы белән булдырылган иде, инде бу чараны үткәрүдә дә алар бик теләп, иганәчелек ярдәме күрсәттеләр.

Иң еракка шуу ярышында балалар гына түгел, ә өлкәннәр дә бик тырыштылар. 14 яшькә кадәрге балалар арасында 1 урында - Адел Хөснетдинов, икенче һәм өченчедә Эмиль Хөснетдинов, Зөһрә Җәләева; 14 яшьтән югарыраклар арасында Лилия Вәлиева, Ләйлә Зиннәтуллина, Рамил Сабиров җиңү яулады.

Ә иң күңеллесе, мөгаен, гаиләләр ярышы булгандыр. Ярышның төп шарты буенча алар бер салазка-чанага сыешып бетергә тиеш иде. Шуңа да алар нинди генә алымнар кулланып карамадылар, шулай да сынатмадылар! Зиатдиновлар гаиләсе - беренче, Габдрахмановлар - икенче, Гыйльметдиновлар - өченче булды.

Ә аерым номинацияләрдә исә яшь ярымлык Тимур Зиатдинов - "Иң кечкенә уенчы", Закиров Радик - "Иң өлкән уенчы", ә Булат Заһидуллин "Иң текә (креатив) чана" иясе булып танылды.

"Каймак" тавыннан "утлар" чыкты... Әлеге чара һәркемнең күңеленә хуш килде. "Факел" яшүсмерләр клубы хезмәткәрләре кайнар коймаклар, чәйләр белән сыйлады. Бу көннең күңелле мизгеллре хәтерләрдә озак сакланыр әле.