Көчле белеклеләр
Күптән түгел генә Балтачның кул көрәштерү осталары бөтен Россияне шаккатырып, Балтач данын еракларга таратып кайттылар.
Беренчесе - Түбән Новгород шәһәрендә 1992-1994, 1995-1996, 1997- 1998 елгы яшьләр арасында Идел буе федераль округы беренчелегенә узган ярышларда Балтач балалар-яшүсмерләр спорт мәктәбе тренерлары бертуган Рамил һәм Ранил Сафиуллиннар җитәкчелегендә көч сынашып, иң матур күрсәткечләргә ирештеләр. 55 килограмм үлчәү авырлыгында Салавыч мәктәбеннән Динар Фатыйхов, Балтачтан Айсылу Фәйзрахманова (70 кг.), Нөнәгәрдән Алинә Камалова (45 кг.), Яңгулдан Айзилә Миңнеханова (70 кг.) һәм Ләйсән Габделганиева (65 кг.), бүгенге көндә Казан авыл хуҗалыгы академиясендә белем алучы Түнтәр кызы Садия Умарова федераль округның чемпионнары булып танылдылар. Чепьядан Артем Иванов (45 кг.), Салавычтан Илгизәр Мөхәрләмов (65 кг.), Фирүзә Яппарова (50 кг.) - икенче, Кунырдан Гөлшат Шиһабетдинова (50 кг.), Түнтәрдән Раилә Корбангалиева (50 кг.) өченче призлы урыннарны яуладылар. Шунысы куанычлы, Фирүзә белән Ләйсән бу җиңүләре белән спорт остасына кандидат нормасын үтәделәр. Икенчесе исә Белгород шәһәрендә булды. Биредә Россия беренчелегенә инвалидлар арасында узган кул көрәшендә бүгенге көндә Казан шәһәренең Ласточкин исемендәге махсус мәктәбендә белем алучы Түбән Субаш авылы кызы Алинә Вафина да 50 килограмм үлчәү авырлыгында ике кул белән дә көч сынашып, үзенә тиңнәр бумавын раслады, спорт остасына кандидат булды. Ә менә Балтач универсаль спорт залы хезмәткәре Гөлзия Гарифуллина 60 килограммнан югары үлчәүдә ике кулы белән дә икенче булды һәм Россиянең спорт остасы нормасын үтәде. Спортчыларыбызны чын күңелдән олы җиңүләре белән тәбрик итәбез, бу ел аларга тагын да зуррак уңышлар алып килсен дигән теләктә калабыз.
Фото Интернет челтәреннән алынды.
Иң мөһим һәм кызыклы язмаларны Татмедиа Telegram-каналында укыгыз
