"Хезмәт" кубогы өчен кызу көрәш барды

Елның беренче көннәрендә ел саен үткәрелүче әлеге бәйгене күпләр яратып, көтеп ала. Бүгенге көннең салкын булмавы да җанатарлар файдасына булды. Бозда кызу булуы билгеле анысы, тамаша кылучыларга да туңарлык булмады, алар яраткан командалары өчен рәхәтләнеп җан атты. Карадуганда Шубан, "Зифа" (Смәел), Карадуган командалары көч сынашып, смәеллеләр өстен чыкты. Нормада Норма, Бөрбаш һәм "Татарстан" (Салавыч) командалары арасында Норма егетләренә тиңнәр булмады. Балтач бозында "Беркут" (Сосна), "Яңа тормыш" (Яңгул), "Нур" Түнтәр командалары очрашты һәм сосналылар финалга үтте. Чутайда "Кызыл юл" (Чутай), "Вираж" (Чепья) һәм Пүскән командалары арасында көчле көндәшлек барды һәм боз хуҗалары үзләре җиңүче булып танылды. Шуның белән беренче көн тәмам. Иртәгә иртәнге сәгать 9:00дә Балтачта Норма-Сосна, Чутай- "Зифа"(Смәел) командалары арасында төп җиңүчене билгеләү буенча ярышлар үтәчәк. Барлык райондашларны әлеге чарага көтеп калабыз.