Матур ярыш булды

Бер дә аптырап тормый инде бу, безнең Фагыйль Фәләхетдинович. Үз тирәсенә бергә эшли торган тренерларны җыеп сөйләште дә, менә дигән итеп, 1997-98 елларда һәм аннан соңгы елларда туган балалар арасында кул көрәше ярышлары оештырды да куйды. Укучыларның республика спартакиадасына сайлап алу ярышлары буларак оештырылгач, сайлап алу өчен дә зур мөмкинлекләр ачылды. Тагын иң мөһиме шунда, бу ярышларның иганәчеләре Балтач балалар-яшүсмерләр спорт мәктәбендә кул көрәшен алып баручы тренерлар үзләре булды. Зур күчмә кубок булдырганнар, төрле дәрәҗәдәге медальләр ясатып алып кайтканнар. Аларны күреп, әй, куанышты инде балалар. «Хыял» яшьләр үзәге гөр килеп торды бу көнне. Балтач балалар-яшүсмерләр спорт мәктәбе һәм «Хыял» яшьләр үзәге директорлары Эмиль Гарипов, Айдар Вәлиев ачылу тантанасында үз киңәшләрен биреп, балаларның күңелен күтәреп җибәрделәр. Шулай итеп, җиңүчеләребезне дә атап узабыз. Кызлар арасында - Надилә Хәкимҗанова (Субаш, 40 кг.), Алисә Хөснетдинова (Субаш, 45 кг.), Алисә Нуриева (Субаш, 50 кг.), Илүзә Гыйльманова (Субаш, 55 кг.), Алсу Фазылҗанова (Нөнәгәр, 60 кг.), Ралия Хисаметдинова (Алан, 70 кг.), Зөһрә Николаева субаш, югары үлчәүдә). Егетләр арасында - Раил Николаев (Субаш, 45 кг.), Рәмзил Шиһабетдинов (Куныр, 50 кг.), Рәсим Хисамиев (Салавыч, 55 кг.), Сергей Пчельников (Чепья, 60 кг.), Марат Әхмәтҗанов (Салавыч, 65 кг.), Рөстәм Гатиятуллин (гимназия, 70 кг.), Виталий Волков (Куныр, авыр үлчәүдә). Күчмә кубок тәүге мәртәбә Субашка (тренеры Ф.Гайнетдинов) китте. Икенче урында - Куныр (Л.Саттаров), өченчедә Чепья (Р. Сафиуллин) спортчылары.

Реклама