Нурзада Сәмигуллин: Волейбол уен гына түгел

Ильнур, 11 ноябрь 2015 - 11:09

2787

Елның-елында "Сельхозтехника" акционерлык җәмгыяте ноябрь бәйрәмнәрендә волейбол спортын үз итүчеләрне ярышка җыя. Быелгы ярышларга да 12 ир-егетләр , гүзәл затларыбыздан торган 4 команда килгән иде.

Нурзада Сәмигуллин: Волейбол уен гына түгел

Ярышларны, гадәттәгечә, котлау сүзләре белән район башкарма комитеты җитәкчесе урынбасары Илһам Гайнетдинов, район спорт бүлеге җитәкчесе Рөстәм Заһидуллин, район волейбол федерациясе рәисе Рафаэль Габдрахманов ачып җибәрде. Уеннар "Балтач" универсаль спортзалының 2 мәйданчыгында гөрләде.

Җиңүчеләр кичкә генә билгеле булды. Ир-егетләр арасында янә "Якты юл" җәмгыяте уенчылары көчле булып чыкты. Шулай инде ул. Осталык кечкенәдән тәрбияләнә кунырлыларда. Мәктәп укучыларына да тиңнәр юк районда. Икенче урынга ярышны оештыручылар үзләре лаек булса, өченче урынга "Активист" җәмгыяте уенчылары лаек булды. Күршеләр белән гел үзара ярышып тору доргалылар өчен дә файдага гына, күрәсең.

Гүзәл затларыбыз да уеннарда кимен куймадылар. Уеннар бик кискен барды. Җиңүче булып Балтач шәһәр җирлеге командасы танылды. Икенче урынга тагын "Якты юл" кызлары чыкты. Өченче урынга исә "Игенче" кооперативы уенчылары лаек булды.

Бәйрәмне оештыручылар иң оста уенчыларны да бүләксез калдырмады, бу көнне. Балтачтан Зәйтүнә Долотказина һәм Кунырдан Фәнзил Хәйретдинов оста уенчылар булып танылды.

Ярышларның шаһитлары бу көнне рәхәтләнеп ял итте. Пылау, шашлык көне буе пеште, табаларда коймак чыжлап торды, самавырдан кайнар чәй өзелмәде.