Тырышлык нәтиҗәсе

Мәсәлән, Куныр урта мәктәбе укучыларының спортка тартылуы, мөгаен, коллективта Ленар Билсур улы Саттаров кебек үз эшенең чын остасы булган физик тәрбия укытучысы хезмәт куюдан да киләдер. Ул дистә еллар дәверендә инде ничәмә-ничә буын балада сәламәт яшәү рәвешенә карата ихтирам һәм мәхәббәт уята алган. Тренер буларак ул әзерләгән укучылар ярышларда призлы урыннар, күкрәк тулы медальләр, Дипломнар белән генә бүләкләнеп калмыйча, мәктәп чорында ук төрле төрләрдә спорт мастерлыгына кандидат исемен алуга ирешәләр. 8нче сыйныф укучысы Әдилә Хафизова район, республика һәм Рәсәй күләмендә туризм, армспорт буенча узган спорт ярышларында алдынгы призлы урыннар яулаганы өчен «Спорт мастерлыгына кандидат» дигән мактаулы исемгә лаек булды (рәсемдә). Аның соңгы елларда гына да төрле дәрәҗәдәге 11 призлы урыны бар. Әдилә спортта гына түгел, укуда да сынатмый. Әти-әнисенә һәр эштә ярдәмче, сыйныфташларына чын дус ул. Шулай ук Гөлинә Бариева, Илсаф Фәсхетдинов кебек укучылар да Куныр мәктәбенең горурлыгы. Мәктәп укучыларының Бөтенрәсәй «Президент ярышлары» бәйгесендә республиканың финал этабында Гөлинә инша буенча, Илсаф өстәл теннисы ярышында (II урын) катнашып, ТР Мәгариф һәм фән министрлыгының Дипломнары белән бүләкләнәләр. Куныр мәктәбенең җыелма командасы да ел дәвамында әлеге дәрәҗәле бәйгедә көчләрен сынап, төрле төрдәге ярышларда күп тапкырлар «Авыл мәктәпләре» номинациясендә мактаулы урыннарга ирешә. Кунырлыларга яңадан-яңа уңышлар теләп калабыз. Авылларда шундый яшьләр үсүе мөгаллимнәрнең дә, әти-әниләрнең дә зур тырышлык нәтиҗәсе.