Волейболны үз итте ул...

1970нче елда Казан дәүләт авыл хуҗалыгы институтын тәмамлаганнан соң, хезмәт юлын «Сельхозтехника»ның Теләче бүлекчәсендә башлап, районыбызның Чепья бүлекчәсендә дәвам итә. Шуннан соңгы гомер юлы аның Балтач «Сельхозтехника»сы белән бәйле булды. 9 ел баш инженер, 13 ел җитәкче. Гомере генә кыска булды. 55 яшендә вакытсыз арабыздан китеп барды.

Онытмыйлар Гыйльфан Әшрәфҗановны авылдашлары. Яңгул авылы спартакиадасы кысаларында аның истәлегенә волейбол ярышлары уздыру матур бер традициягә әверелде. Гомере буена спортны үз итте ул. Күңелен бигрәк тә волейболга бирде. Шунысы игътибарга лаек, үзеннән соң аның дәвамчылары калды. Менә бүген дә, заманында аның тырышлыгы белән районыбызда беренче булып ачылган «Сельхозтехника»ның спорткомплексында мәрхүмнең авылдашы, хезмәттәше, дәвамчысы Ринат Гарипов сүз алып: - «Авылыбыздан чыккан нинди генә бөек шәхесләребез булмасын, истәлекләрен яңартып тормасак, алар онытылачак, югалачак. Аеруча районыбызның авыл хуҗалыгы, икътисадый, социаль-көнкүреш өлкәсенә фидакарь хезмәтен куйган авылдашыбыз Гыйльфан Әшрәфҗановичны онытырга хакыбыз юк», - диде.

Авылдашлары аны бер минут тынлык белән искә алдылар. Күчмә кубокларын булдырганнар. Шәхеснең фотосы куелган дәрәҗәле медальләр эшләткәннәр. Анысына исә туганнары Илшат һәм Марат Әшрәфҗановлар матди ярдәм күрсәткәннәр. Бу көнгә бәйрәм өчен авыл яшьләре Яңгул авыл җирлеге башлыгы Ринат Гариповка, «Яңа тормыш» җәмгыяте рәисе Мәгъсүм Сәйфетдиновка да рәхмәтле булдылар. Кубокны авылның югары очында яшәүче уенчылар яулады. Икенче урынга - урта мәктәп, өченчегә Таулы урамындагылар лаек булды.

Рәсемдә: Әшрәфҗанов призы.