Яшәсә Илшат, Тәлгатьләр...
Газетабызның бер санында Норма хоккей үзәгенә әйләнде дип язган идек инде. Билгеле, бу авыл эшмәкәр Илшат Шакиров, Тәлгать Газизов кебек хоккейга бирелгән кешеләре булмаса алай ук балкымас та иде.
Олы җанлы, киң күңелле кешеләребезнең берсе Илшат беренче булып 1995-1996 елгы балаларыбызны кәшәкә суктырып сөендергән иде. Бу ярышларда районыбызның 10 мәктәбеннән яшь хоккейчыларыбыз ике көн рәхәтләнеп уйнап, үз араларында иң көчлеләрне ачыкладылар. Һәркем үз оясында көчле шул... Норма уенчыларына тиңнәр булмады. Икенче урынга - Түнтәр, өченчегә Балтач мәктәбе уенчылары чыкты. Бу җиңүләргә мәктәпләребез базасында спорт мәктәбенең Р.Садыйков, Р.Зәйнетдинов, И.Галимуллин кебек хоккей буенча тәҗрибәле тренерларыбыз эшләве дә сәбәпче булгандыр инде. Икенчесен исә зурлар арасында Тәлгать уздырды. 12 команда беренче көнне - Норма, Чепья, Бөрбаш, Карадуган бозларында уйнап, финалга чыгачак командаларны ачыкладылар. Финал ярышлары исә Норма бозында узды. Әй, уйнап та карадылар инде бу көнне. Ярымфинал уеннарында карадуганлылар бөрбашлыларны 4:1, «Балтачагрохимсервис» командасы чепьялыларны 2:1 исәбенә отып, финалга уздылар. Финал ярышларында исә, «Химик» командасына тиңнәр булмавы ачыкланды. Алар карадуганлыларны 2:0 исәбенә отуга ирештеләр. Бөрбашлыларны исә чепьялылар гомумән 0:8 исәбенә уйнап, аларга тын алырга да ирек бирмәделәр. Шулай итеп, «Балтачагрохимсервис» командасы - беренче, «Игенче» хуҗалыгы - икенче, «МДСУ-1»нең Чепья бүлекчәсе өченче булды. Җиңүче командаларга Тәлгать саллы гына акчалата бүләкләр тапшырды, традиция буенча өч иң яхшы уенчыны да билгеләп узды. Һәр команданы кубоксыз да калдырмады. Менә шулай... Тәлгать, Илшат кебек «хоккей җанлы» кешеләребез булганда, яши әле хоккей, яши.
Фото интернет челтәреннән алынды.
