Район үзәк хастаханәсе табибына карата кузгатылган җинаять эшенә нокта куелды

Тикшерү материалларыннан күренгәнчә, 2016 елның маенда хастаханәгә эче авыртудан зарланган 40 яшьлек ир китерелә. Аңа "Хроник панкреатит. Хроник гепатит" диагнозы куела. Чынлыкта исә авыруның ашказаны җәрәхәте тишелгән була. Дөрес булмаган диагноз аркасында авыруда сепсис белән катлауланган перитонит башлана. Соңга калып ясалган операция тиешле нәтиҗә бирми, авыру үлә. Суд-медицина экспертизасы табибның эш-гамәлләре белән авыруның үлеме арасында сәбәп-нәтиҗә бәйләнеше барлыгын ачыклый. Судта прокурор табибка өч елга иреген чикләү җәзасы һәм шул срокка медицина учреждениеләрендә эшләү хокукыннан мәхрүм итүне сорый. Шуннан соң хирург матди зыян өчен компенсация сыйфатында үлгән ирнең тол хатынына 500 мең сум акча тәкъдим итә. Әлеге сумма зыян күрүче якны канәгатьләндерә һәм җинать эше туктатыла.