Сәламәтлекне кайгырту максатыннан, Балтачта эш урыннарына тикшереп кертә башладылар

Куркыныч чирдән район халкын саклау чаралары, гигиена таләпләрен пропагандалау даими алып барыла.Мәсәлән, районыбыздагы бер зур оешмада эшкә килүчеләрнең тән температураларын үлчәп, сәламәтлеген тикшереп кертәләр, эш бүлмәләренә кварц лампочкалары урнаштырылган. Хезмәткәрләрдән эш урыннарында маскалардан булу таләп ителә. Бу кадәргесен һәр эш коллективы эшли ала. Сәламәтлек беренче урында, шуны онытмыйк!

Исегезгә төшерәбез: Татарстанда  15 апрельгә кадәр махсус режим кертелде. Ул республикага коронавирус үтеп керү куркынычы белән бәйле.

«Республикада әлегә куркыныч юк,  болар саклану чаралары гына. Куркыныч булмасын өчен без барысын да эшлибез.Кешеләр ныклап  аңларга тиеш, әгәр дә без эчке периметрларны контрольгә алмыйбыз икән, бик авыр хәлдә калуыбыз ихтиимал », —диде Рөстәм  Миңнеханов.

Президент республикада  спорт һәм мәдәни чаралар үткәрүгә дә чик куелуына игътибар итте. Таләпләрне тиешенчә үтәргә чакырды.

Коронавируска каршы көрәш буенча төзелгән Республика штабы, РТ  Президенты фәрманы буенча,    13 марттан 15 апрельгә кадәр республикада махсус режим кертте. Халыкара чаралар соңрак үткәреләчәк.  Спорт матчлары да тамашачысыз гына узачак,  мәдәни чаралар да күчте. Планлаштырылган гастрольләр, концертлар, әгәр дә   оештыручылар  барлык таләпләрне дә үтәсә һәм тамашачыларның сәламәтлекләре өчен җаваплылыкны үз өсләренә алсалар гына үтәчәк.

Штаб хезмәткәрләре  Татарстанда яшәүчеләргә чит илләргә бармаска куша. Язгы каникулларда бигрәк тә. Баласының сәламәтлеге турында уйлаган кеше моны үзе үк  тә эшләми. Ә инде инфекция теркәлгән территорияләрдән кайтучыларга Роспотребнадзор  хезмәткәрләренә кайтуыңны, барган җиреңне, контактларыңны хәбәр итәргә кирәк. Моның өчен  республикада тәүлек  буе “Кайнар линия” телефоны эшли: +7(843)296-02-24. Симптомнар сизелә калса, кичекмәстән  табибка мөрәҗәгать итәргә кирәк