Татарстанда тагын 49 кеше коронавирус инфекциясе йоктырган

Татарстанда соңгы тәүлектә Covid-19 коронавирус инфекциясе йоктыруның 49 яңа очрагы ачыкланган.

ТР Сәламәтлек саклау министрлыгының матбугат хезмәтеннән хәбәр итүләренчә, бер кеше чирне читтә йоктырып кайткан, калганнары башка авырулар белән аралашу нәтиҗәсендә эләктергән.

«15 кеше хастаханәгә озатылган, 34 кеше өендә дәвалана», - диелә ведомство хәбәрендә.

Казанда – 28, Чаллыда – сигез, Тукай районында – биш, Бөгелмә һәм Питрәч районнарында – икешәр, Баулы, Алабуга, Мамадыш һәм Нурлат районнарында берәр очрак ачыкланган.

Пандемия башланганнан алып республикада коронавирус инфекциясенең 25 077 очрагы теркәлгән, 22 014 кеше (шуларның унысы – узган тәүлектә) терелгән.

Республикада барлыгы 961 123 кеше коронавируска каршы прививка ясаткан. 800 427 кеше икенче дозаны да алган.

Чыганак: ТИ