Яман чирдән сакланыйк!

Безнең районда ВИЧ инфекцияле 3 кеше исәптә тора. Билгеле, бу сан даими үзгәреп тора. 2002нче елдан башлап илдә ВИЧ инфекциясен җенси юл аша йоктыручылар саны арта. Һәрбер ун очракның дүртесе хатын-кызларга туры килә, аларның яртысыннан артыгы саклану чараларыннан тыш җенси мөнәсәбәткә керә. Күпләр үзләренең чир ияртүләрен очраклы рәвештә, хатын-кызлар консультациясенә исәпкә басканда яки операция алдыннан тикшеренү үткәндә беләләр. Стерилизацияләнмәгән медицина һәм башка әсбапларны уртак рәвештә, яки кабаттан кулланганда, ВИЧлы анадан балага йөкле вакытта, тудырганда яки имезгәндә күчәргә мөмкин. Ә нинди очракта ВИЧ кешедән кешегә күчми?
Кул биреп күрешкәндә, кочаклашканда, үбешкәндә, төчкергәндә, уртак савыт-сабадан ашаганда, хайван яки бөҗәк тешләгәндә. Шуңа күрә бәдрәф яки ванна бүлмәләреннән һичнинди шөһбәсез файдаланырга була.
Йомгаклап шуны искәртергә кирәк: һәрбер кеше ялгыш адымга барганда үзенең, якыннарының сәламәтлеге турында уйлансын иде. Иң мөһиме, яман чирдән сакланыйк!