Балтач хуҗабикәләре яран гөле үстерүнең серләрен белә (фото)

Халыкта йортта алсу төстәге яран чәчәк атса - кемдер гашыйк була яки кияүгә чыга, өйләнә. Агы чәчәк атса - гаилә ишәя. Кызыл яран йортны низаг-тавыштан саклый, дигән ышанулар да саклана. "Шау чәчәккә күмелеп утырган яраннарга сокланмаган кеше юк. Моның сере иң элек су сибүгә бәйле. Аена бер тапкыр суга аспирин (5 литр суга 1 таблетка) кушам. Йодлы су (1 литр суга 1 тамчы йод) сибүнең дә яран өчен бик зур файдасын күрәм. Мондый ашламадан соң гөлкәйләрем бертуктаусыз чәчәк атып утыра. Тәрәзә төбендә дә, ачык һавада бакчамда да утыртам. Хуш исле яран үсеп утырган өйдә көя булмый, чебен, башка төрле бөҗәкләр дә керми", ди Балтачта яшәүче Нурия ханым.