Чепья авылы балаларына тагын бәхет елмая... (фото)

Бүгенге көндә Президент вазыйфаларын башкаручы Рөстәм Миңнеханов тарафыннан хупланган 120 урынлы балалар бакчасы төзелеше чепьялылар өчен тагын бер тарихи һәм шатлыклы вакыйга.

Төзелешне алып баручы «Созидание» ширкәте Казан шәһәреннән булса да, аның төзүчеләре үзебезнекеләр. Узган ел Балтач бистәсендә нәкъ шушындый балалар бакчасын төзеп тапшырган мастер Фердинант Шәфигуллинны Чепьяда төзелеш мәйданчыгында очрату табигый хәл, дип кабул ителде.

«Казаннар бу төзелешне җитәкләүне сорагач, каршы килмәдем. Нәрсәдер төзисең икән, димәк җирдә синең эзең кала, үзеңнең юкка яшәмәгәнеңне тоясың», ди ул. Фердинант Салавыч егете, белеме буенча төзүче. Заманында төзелеш һәм архитектура югары уку йортын тәмамлагач, «Азатлык» мәйданында урнашкан Министрлар Кабинеты бинасын төзүдә мастер булып катнаша. Шуннан соң аңа аерым биналар төзелешенә җитәкчелекне ышанып тапшыралар.

Казан шәһәрендә 2 балалар бакчасы, 1 урта мәктәп бинасын төзетә. Үзенең туган районы Балтачта кулланучылар җәмгыятендә төзелеш өлкәсен җитәкләп үзәк универмаг, кибетләр, фатирлар салдыруда катнаша. Данлыклы «Казхимстрой» оешмасының райондагы вәкиле буларак, бистәнең Нариман урамында 2 катлы кирпеч йортлар, икенче номерлы балалар бакчасы, хәзер район мәгариф идарәсе урнашкан элеккеге кунак йортын сафка кертүдә Фердинантның өлеше зур була.

Менә бу Чепьядагы балалар бакчасы аның өчен өченчесе. 20 кешелек коллективны гомуми эшкә нәтиҗәле туплый белергә, төзелеш кирәк-яракларының вакытында кайтарылуы, һәр эшнең проектта каралганча башкарылуы, кыскасы, барысы өчен җавап бирергә кирәк. Балалар бакчасын 1нче августка тапшыру вакыты куелган икән, ул үтәлергә тиеш. Инде беренче катны өеп бетереп киләләр һәм шушы ук вакытта подвал өлешендә эчке эшләрне дә алып баралар. Төзелешкә акчаны республика бюджеты бирә, ул Республика Программасы буенча эшләнә. Эшләргә мөмкинлек булганда, төзелешне срогында төгәлләү безнең бурыч, дип саный төзүчеләр.