Контракт буенча хәрби хезмәтнең өстенлеге дә бар, кимчелеге дә юк түгел

Ильнур, 23 июль 2014 - 09:23

2490

16 июль көнне район хакимияте йортында контракт буенча хәрби хезмәт мәсьәләсенә багышланган җыелыш узды. Кичә Татарстан Республикасы Хәрби комиссары генерал-майор С.Н.Погодин белән очрашу булды.

Ул һәм контракт буенча хезмәт итү мәсьәләләре белән шөгыльләнүче командасы очрашуга килгән райондашларга бу хезмәтнең өстенлекләре турында сөйләделәр.

Быел Балтач районыннан 8 кеше контракт буенча хезмәт итәргә киткән. Республика куйган бурычның 12 проценты үтәлгән. Планны үтәү өчен тагын 12-14 кеше җибәрергә кирәк.

Башкарма комитет җитәкчесе Рамил Шакиров: «Бу бик катлаулы проблема. Әмма яшь егетләргә районда эшсез тилмереп яисә 7-8 меңгә эшләп йөргәнче, контракт имзалау кулайрак дип уйлыйм», - диде.

Контракт буенча хәрби хезмәтнең өстенлекләре дә шактый: хезмәт хакы югары, торак мәсьәләсе хәл ителә, 45 көнгә якын ял, карьера баскычы буйлап үсеш һ.б. Әмма кимчелекләре дә юк түгел: беренче 3 айда «курс выживания» узу авыр, килгәч тә форма мәсьәләсе җиңел хәл ителми һ.б.

«Балтачка иң якын частьлар булып Самара һәм Тоцк шәһәрләрендә урнашканнары санала. Хезмәт итүчеләрнең зарланганнары юк», - дип белдерде район хәрби комиссариатының бүлек җи-тәкчесе Марат Муллахмәтов.