Эш сөйгәнне ил сөйгән

Районыбыз үзенең тырыш халкы белән мактала. Тимирязев исемендәге хуҗалыкның комбайнчысы Илфат Әсхадуллин шикелле хезмәт кешеләре турында «таш өстендә гөлләр үстерердәй», дип юкка гына әйтмиләр.

Хезмәт юлын ул туган колхозында 1982 елда, Норма профтехучилищесында укыганда комбайн ярдәмчесе булып башлый, икенче елында «Нива»га утыра, соңрак «ДОН-1500» комбайннарында эшли. Менә 16 елын ул үзенә тапшырылган «Тукано-430» комбайны белән урып-җыюда катнаша. Эш дәверендә Республикада өч тапкыр иң яхшы комбайнчылар исемлегенә кертелде, районда беренче урынга чыкканнары да дистәдән артык.

Быел ярдәмчесе Норма мәктәбе укучысы Эльвир Хәбибрахманов белән 41нче уракта катнаша. Нәтиҗәләре дә сөендерерлек, бүгенге көнгә алар районда иң күп ашлык суктыручылар исемлеген әйдәп баралар.

Эшләрегез һәрчак шулай уң булсын!