Күздә – яшь, күңелдә – рәхмәт

Бездә җитәкчеләр дә, гади халык та бик кешелекле, башкалар хәсрәтен дә үзенеке кебек кабул итә икән! Кайгыбызны уртаклашмаган, ярдәм итмәгән кеше калмады да бугай... Ихластан юату сүзләре әйткән, кайбызны җиңеләйтергә теләп, уртаклашкан, матди ярдәм күрсәткән,  соңгы юлга озату йолаларын башкарган барлык туганнарга, дусларга, авылдашларга, хезмәттәшләргә, балаларның сыйныфташларына, аларның әти-әниләренә, мәктәп коллективына газета аша чиксез рәхмәтләребезне җиткерәсе килә.

Айдар гади генә бер хезмәткәр иде. Зур вазифалар да биләмәде. Әмма аның дуслары, танышлары бихисап иде. Кылган гамәлләре белән (Айдар – Яңа Салавыч авылында мәчет төзетү эшендә башлап йөрүче иде – ред.) авылдашлар алдында гына түгел, район җитәкчеләре каршында да хөрмәт яулаган булган икән. Аны зурлап соңгы юлга озатырга килгән район башлыгы Рамил Нотфуллинга, ул чактагы башкарма комитет җитәкчесе Рамил Шакировка, урынбасарларына, бүлек мөдирләренә, Айдар эшләгән “Төзекләндерү” ширкәте җитәкчесе Наил Габдрахмановка, барлык коллективка, “Татарстан” җәмгыяте җитәкчесе Айнур Нотфуллинга, Рамил хәзрәт Бикбаевка, Габделфәрт абый Латыйповларга, гаиләбез исеменнән, чын ихластан рәхмәтебезне белдерәбез. Безгә кылган яхшылык-изгелекләрегез үзегезгә меңе белән кайтсын! Кайгы-хәсрәт күрми яшәгез!

Венера ВӘЛИЕВА,
Яңа Салавыч авылы.