район хәбәрләре

Реклама

Яшьләр калышмый
Икътисадый күрсәткечләр буенча районда «Балтач сөт-май комбинаты», «Балтач Агрохимсервис» җәмгыятьләре алда бара. «Мехчы» җәмгыяте дә уңышлы гына эшләп килә. Моннан өч ел элек Кариле авылында үз эшчәнлеген башлаган «Профиль» җәмгыятенең күрсәткечләре дә мактауга лаек. Яшь хезмәткәрләрдән торган бу кечкенә оешма үз базасын тагын бер станокка баетырга җыена.

«Сөт май сыр»
«Балтач сөт-май комбинаты»на, шаярып кына әйткәндә, «сыр» сүзе дә өстәсәң урынлы, чөнки биредә сыер мае, коры сөт җитештерүдән кала, 12 төрле сыр гына эшләп чыгаралар. Һәм шуларны Рәсәйнең төрле өлкәләренә сатуга озаталар. Исемнәре дә яңгыраешлы: «Буковинский», «Витязь», «Гауда», «Костромской», «Российский», «Маасдам», «Пошехонский», «Сливочный», «Сметанковый», «Эдам», «Голландский», «Бал-тасинский мраморный». Соңгы икесен райондашларыбыз яратып ала.

Төлке кергән абзарга
Әллә ачлыктан, әллә салкыннан, кичке якта төлке Норма фермасының бозау абзарына кергән. Көтелмәгән кунакны ферма эшчеләре сәнәк белән бәргәләп-төрткәләп үтергәннәр. Котырганмы-түгелме икәнлеген ачыклау өчен, җанварны Казанга - экспертизага озатканнар. Бичара төлке, тавык фермасы дип уйлагандыр инде...

Олылардан үрнәк аласы
Кили авылында яшәүче пенсионер Нәкыйп ага Шиһапов кошларны кышкы салкыннан, ачлыктан саклап калу максатыннан, өенең тәрәзә каршындагы кар өеме өстендә һәрчак таба зурлыгында җим савыты тота. Җим чүпләргә килгән чыпчыклар арасында, урман якын булганлыктан, әллә нинди матур урман кошлары да күренгәли.