Русиядә автоном Рунет турында закон көченә керде

Әлеге закон нигезендә, интернетның Русия сегменты эшенә куркыныч тудыра торган факторлар барлыкка килсә, "Роскомнадзор" ил территориясендә гомум файдаланудагы элемтә челтәре белән үзәкләштерелгән тәртиптә идарә итүне үз өстенә ала алачак. Русия Министрлар Кабинеты идарә итү тәртибен раслаячак һәм куркынычларның төрен билгеләячәк. Мәскәүдә Гомум файдаланудагы элемтә челтәре белән идарә итү һәм мониторинг үзәге, федераль округларда исә ярдәмче үзәкләр булдыру күздә тотыла.

Русиядә Санлы үсеш, элемтә һәм коммуникацияләр министрлыгында искәртүләренчә, әлеге яңалык элемтәнең сыйфатында чагылыш тапмаячак, Русия кулланучылары исә бернинди үзгәрешләрне дә тоймаячак. Бу хакта ТАСС агентлыгы хәбәр итә.

Интернетны үстерү институтында да шундый фикердә торалар.

«Русия дөньякүләм интернет-киңлекнең бер өлеше булып калачак, әмма киләчәктә Рунеттагы Русия сегментының тотрыклылыгы артачак кына», - дип белдерделәр институтның матбугат хезмәтендә, дип яза Кызыл таң.