Урам исемнәре, элмә такталар ике телдә язылганмы?

Кичә  генә ачылган чаңгы базасының  өч телдә язылган исемен күрдем дә “шәп”  дип куйдым. Чыннан да,  татар килсә ЧАҢГЫЧЫ Йорты ди, урыс та ДОМ ЛЫЖНИКАканы тиз таба, үтеп барышлый  инглиз дә HOUSE OF SKIERка кереп чыгарга мөмкин. Начар түгел бит, туган телгә дә хөрмәт бар, уртак телгә дә бәя зур, чит телгә дә урын калган. Ә бистәдәге кибет исемнәренә, элмә такталарга карыйк, кайсыберсендә өч телдә түгел, татарча да язылмаган, язылса да русча булырга мөмкин. Бөтенесен бер калыпка салу түгел, бар чын татарча балкып торганнары да. Каршы килүчеләр булыр, ләкин үз телен,  милләтен хөрмәт иткәннәр татар сүзләреннән хурланмас, элмә тактадагы хаталарны да төзәтер, исемнәрне дә татарчалаштырып элеп куяр.