Яңа чакта бигрәк затлы, лаклаган күк ялтырый...

Юккамени, хәтта Галош көне дигән аерым датасы дә бар. Бу шаян шигыремне шуңа багышладым әле.

Баскыч төбе тулып ята
Эреле- ваклы галушлар.
Аякка җәһәт эләсең
Өйдән чыгып барышлый.

Галушларның бар төрлесе:
Чәчәклесе,кызылы.
Шахтер дигән бик зурысы,
Бик затлысы- мехлысы.

Галуш бит ул бигрәк уңай:
Юк шнурлап куясы.
Үкчә төшә дип куркасы,
Юк замоклап торасы.

Бакчада кияргә бик шәп,
Җиләккә дә во дигән!
Яңгыр яуса,куркыныч юк-
Алданмый аны кигән.

Кигән - салган чакларымда,
Һичбер азап күрмимен.
Тик тиз туза,сезонына
Дүрт - биш галуш - минимум!

Яңа чакта бигрәк затлы,
Лаклаган күк ялтырый.
Хет яланаякка элдер,
Наски белән дә ярый.

Буталмасын әле диеп,
Кемдер кнопка кадый.
Кемдер язып куя шунда,
Кемдер буявын сылый.

Мәчетләргә дә бабайлар
Ару галуштан бара.
Кайсы обувь универсаль
Шушы галуштан кала?!

Һич олы булырга ярамый
Зурлап чакыргач аштан.
...Мәҗлескә бара әбиләр
Кызыл эчле галуштан.

Русларда ул - калоши,
Безнең телдә ул- галуш.
Аның да бәясе арткан,
Менә хәйраннар калыш!

Илсөя Һадиева
Кариле авылы