Юлларыгыз сикәлтәсез булсын!
«Юл» дигән бер нәни сүз бар. Тик сүзе генә кечкенә, үзе ул иксез-чиксез. Юлга чыгасы кешегә: «Барыр юлларың уң, сикәлтәсез булсын», дибез. Тик күп вакытта тигез юллар да кеше гомеренең өзелүенә сәбәпче була.
Юл фаҗигаләрендә сабыйларның бер гаепсезгә зыян күрүләре тагын да аянычлы. Безнең мәктәп-бакчада да укытучы һәм тәрбиячеләр балаларга юлларда имин йөрү кагыйдәләрен аңлаталар. Моның өчен аерым бүлмә җиһазландырылды. Нәниләр буш вакытларында монда кереп юл хәрәкәте кагыйдәләрен төгәл үтәргә, игътибарлы, сак булырга, аяныч хәлләргә юлыкмаска өйрәнәләр, әти-әниләре белән берлектә рәсемнәр ясап алып киләләр.
Быел да бакчабызга район ЮХИДИ җитәкчесе Фәргать Шәфигуллин килде. Балалар бу көнне зур түземсезлек белән көтте. Сабыйлар ике командага бүленеп, юл йөрү кагыйдәләрен өйрәнү буенча көч сынаштылар: шигырьләр сөйләделәр, зирәклектә үзләрен сынадылар, җырлар башкардылар, төрле биремнәр үтәделәр. Бәйрәм ахырында Фәргать абый балаларга үзен кызыксындырган сорауларын бирде. Мәсәлән: юл билгеләрен таныйсызмы? Машинада махсус утыргычларыгыз бармы? Велосипедта ничә яшьтән юлда йөрергә ярый? Нәниләр дә югалып калмады, Фәргать абыйларын якын итеп, аның янәшәсенә җыелып, үзләренең җавапларын җиткерделәр.
Соңыннан кунаклар сабыйларга юл хәрәкәте билгеләрен һәм кагыйдәләрен төгәл белергә кирәклеген әйтеп, үзләренең бүләкләрен тапшырды. Әйе, бу көн балалар күңелендә әле озак сакланыр. Курыкмыйча, әмма саклык белән юл аркылы чыксаң, урамда дөрес юл сайласаң, автобуска яисә машинага ничек утырырга, анда үзеңне ничек тотарга кирәклеген белсәң, һичшиксез туган йортыңа исән-имин кайтырсың. Машинаны йөртер һәм бәлага очрамас өчен дә юл хәрәкәте кагыйдәләрен белергә, үзеңне киләчәк тормышка хәзердән үк әзерләргә кирәк.
