2017 ел нинди вакыйгалар белән истә калды? (сораштыру)

Алмаз Әхмәтгалиев, Кариле авылы: 
– Узып киткән Әтәч елы безнең гаиләгә мәшәкатьләр белән керсә дә, мин аны бик кызыклы һәм бүләкләр елы, дип әйтер идем. Тормыш үз авырлыгын каршыма кую белән әтәч дускай аның артыннан ук миңа бүләк ясады. Иң беренче бүләге – шигыремә җыр булды. "Идел" журналы, "Хезмәт" газетасында, "Казан утлары" сайтында әсәрләрем басылды. Үзебезнең олпат әдибебез Гарифҗан абый Мөхәммәтшин белән танышып, иҗатыма карата фикерен белдем, киңәшләрен алдым. Шигырьләрем белән үзебезнең "Кариле авылы тарихы" китабына кердем. (Яшь иҗатчыга бу үзе бик зур бүләк инде). "Ызандашлар" төркемендә дә югалып калучылардан булмадым. Сания апа Әхмәтҗанова, Гөлүсә Батталова белән якыннан танышып, әдәбият дөньясында бергәләп “кайнау” узып киткән елның иң матур хатирәләре. Ә гаиләмә килгәндә сер булып калсын. Һәр кешенең үз сере булырга тиеш.