Аерылышсагыз, никах балдагын сакламагыз!

Гадәттә, күпләр бер-берсенә бик рәнҗеп, үпкәләп, ачуланышып аерылыша. Кайберәүләр бу вакытта җан ачуы белән никах балдакларын атып бәрә. Гаҗәпләнерсез, ләкин алар дөрес эшли, чөнки шулай еллар буе җыелган негативтан арына.

Психологлар да никах балдагын сакламаска киңәш итә. Хәтта сул кул бармагына киеп йөргән балдак та һәрвакыт уңышсыз мөнәсәбәтләр турында искә төшереп торачак. Бу яңа танышуларны да тоткарларга мөмкин.

Халык сынамышларына ышансак та, аерылышканнан соң балдакны я ташларга, я, эретеп, башка бизәнгеч эшләтергә кирәк.
Әгәр кеше бу балдакны башкага бүләк итсә, ул аңа барлык негативны да күчерәчәк. Белгечләр аерылышканнан соң калган балдакларны негатив өчен “магнит” белән чагыштыра.

Кыйммәт йөзекне ташлау кызганыч, әлбәттә. Аны ломбардка тапшыру хәерлерәк. Акча артык булмый!

Бик сирәк очракта гына кешеләр матур, яхшы мөнәсәбәтләр саклап аерылыша. Бу очракта никах балдагын истәлеккә сакларга мөмкин, ди белгечләр.

Фото: https://zen.yandex.ru/

Автор:Ләйсән Якупова

Чыганак: Кызыл Таң