Айга кырын карама (4-10 февраль)

Авыр энергетикалы көн, алдашу, ялганга бай. Хәтта сыйфатлы ризыклар белән дә агулану ихтималы бар. Күп аралашу хупланмый. Фикерләрне тупларга, үзегезне үпкәләткән кешеләрне кичерергә кирәк. Үпкә, ашказаны зәгыйфь. Кан басымы күтәрелергә, йөрәк, арка яки баш авыртырга мөмкин. Мунча керү файдалы.

Миләш сихәте
Ашказанының кислоталылыгы түбән булганда, үт куыгы ялкынсынганда, көненә 3 тапкыр, ашарга 20-30 минут кала, 1 әр чәй кашыгы миләш согы эчәргә кирәк. Яки 20 грамм коры җиләкне 1 стакан кайнар суда 4 сәгать төнәтәләр, көненә 2-3 тапкыр, ашар алдыннан, яртышар стакан эчәләр. Кан тамырлары склерозыннан интеккәндә, 5 аш кашыгы төелгән миләш кайрысын ярты литр суга салып, сүрән утта 2 сәгать пешерәләр, суытып, сөзәләр, көненә 3 тапкыр, ашарга ярты сәгать кала, 30 ар миллилитр эчәләр. Дәва курсы 1,5-2 ай. Кардиосклероз булганда да шулай дәваланырга ярый, тик ярты сәгать кенә кайнатырга һәм көненә 3 тапкыр 1-2 шәр аш кашыгы кабарга кирәк.

5 февраль (якшәмбе). Җөмәдел әүвәл аеның 8 нче көне. 10 нчы Ай тәүлеге. Ай Игезәкләр йолдызлыгында, 11.10 сәгатьтә калка, 1.51 сәгатьтә бата. 2 нче фаза. Көн озынлыгы 8.56 сәгать.

Нәсел, гаилә, гореф-гадәтләр белән бәйле көн. Ял итү, йокы туйдыру, гаиләне ныгыту өчен иң шәп вакыт. Әйләнә-тирәдәгеләргә игътибарлырак булу сорала. Сизү әгъзалары, йөрәк-кан тамырлары системасы, сөякләр зәгыйфь. Ач тору файдалы.

Истә тоту мөһим
Диабеттан интегүчеләргә атнасына 3 йомырка, көненә тавык йомыркасы зурлыгындагы 2 бәрәңге, 3 кисәк арыш икмәге, 1 аш кашыгы үсемлек мае ашарга ярый. Ашарга ярты сәгать кала 1 стакан кайнамаган су эчкәндә, ашказаны асты бизенең юллары чистара һәм инсулин бүленеп чыгу арта. Инсулин ачылганчы, табибләр шикәр авыруыннан интегүчеләргә ач яки ярымач (бер генә төрле ризык, мәсәлән, гел солы боткасы гына ашап) торырга куша торган булган.

6 февраль (дүшәмбе). Җөмәдел әүвәл аеның 9 нчы көне. 11 нче Ай тәүлеге. Ай Игезәкләр йолдызлыгында, 11.50 сәгатьтә калка, 3.07 сәгатьтә бата. 2 нче фаза. Көн озынлыгы 9.00 сәгать.

Үзгәрү, сафлык, катгыйлык көне. Һәр эштә дә сак һәм игътибарлы булу сорала. Башланган эшне ахырына җиткерергә кирәк. Бу көннең энергетик куәте бик зур, кешедә искиткеч табигый көч уянырга мөмкин. Арып-талганчы эшләргә ярамый. Сизү әгъзалары, йөрәк, умырткалык, үпкә зәгыйфь.

7 февраль (сишәмбе). Җөмәдел әүвәл аеның 10 нчы көне. 12 нче Ай тәүлеге. Ай Кысла йолдызлыгында, 12.40 сәгатьтә калка, 4.17 сәгатьтә бата. 2 нче фаза. Көн озынлыгы 9.05 сәгать.

Шәфкать, сабыр­лык, мәхәббәт энергиясенә бай көн. Сәламәтлеккә игътибарлы булырга, йөрәккә киеренкелек китермәскә кирәк. Ашкайнату әгъзалары, кан әйләнеше системасы зәгыйфь. Дарулар яхшы үзләштерелә.

1 аш кашыгы вакланган дүләнә чәчәге яки җимешен 1 стакан кайнар суга салып, кайнап торган сулы икенче кәстрүлгә утыртып, 15 минут пешерәләр, суытып, сөзәләр, көненә 3 тапкыр, ашарга 30 минут кала, өчтән берешәр стакан эчәләр. Йөрәк ритмы бозылганда, 2 чәй кашыгы вакланган тырнак гөл (календула) яфрагын 1 стакан кайнар суда 1 сәгать төнәтәләр, сөзәләр, көненә 3 тапкыр өчтән берешәр стакан эчәләр.

8 февраль (чәршәмбе). Җөмәдел әүвәл аеның 11 нче көне. 13 нче Ай тәүлеге. Ай Кысла йолдызлыгында, 13.40 сәгатьтә калка, 5.18 сәгатьтә бата. 2 нче фаза. Көн озынлыгы 9.09 сәгать.

Үзгәрешләр көне. Үткәннәр турында уйланып, нәтиҗәләр ясау яхшы. Ач торырга ярамый - теләсә нәрсә ашарга була. Аралашу, белем алу өчен уңай вакыт. Йөрәк, тире, кан тамырлары зәгыйфь. Чикләвек ашау файдалы.

Суган балы
Салкын тигәндә, уртача зурлыктагы 1-2 суганны кабыгын чистартмыйча 1 литр суга салалар, 1 стакан шикәр өстиләр, яртылаш кимегәнче, сүрән утта пешерәләр, аннары суганнарын җыеп алалар. Кайнар килеш яртышар стакан эчәләр. 2 көндә эчеп бетерергә кирәк, хәл яхшырмаса, тагын 2 көн дәваланырга була.

9 февраль (пәнҗешәмбе). Җөмәдел әүвәл аеның 12 нче көне. 14 нче Ай тәүлеге. Ай Арыслан йолдызлыгында, 14.49 сәгатьтә калка, 6.07 сәгатьтә бата. 2 нче фаза. Көн озынлыгы 9.13 сәгать.

Иң әһәмиятле эшкә тотыну өчен уңайлы көн. Бүген башланган эш бик яхшы тәмамланачак. Теләсә нинди вак-төяккә игътибарлы булу сорала. Эчәклек һәм тирене чистарту уңай нәтиҗә бирә. Ашказаны асты бизе зәгыйфь. Балан, фасоль, борчак, арпа ашау файдалы.

Магнитлы көндә
Магнит давыллары тәэсиреннән интеккән кешегә 1 аш кашыгы вакланган кандала үләнен (донник) 1 стакан кайнар суда 1 сәгать төнәтеп, сөзәргә, көненә 2-3 тапкыр яртышар стакан эчәргә кирәк. Кандала үләне канны сыегайту үзлегенә ия.

10 февраль (җомга). Җөмәдел әүвәл аеның 13 нче көне. 15 нче Ай тәүлеге. Ай Арыслан йолдызлыгында, 16.03 сәгатьтә калка, 6.48 сәгатьтә бата. 2 нче фаза. Көн озынлыгы 9.18 сәгать.

Авыр энергетикалы көн. Бүген кеше үз нәфесенең теләк һәм коткыларына бигрәк тә бирешүчән.Тыелгысыз хисләр күңелсез вакыйгаларга китерергә мөмкин. Тәэсирләнүчән кешеләргә аеруча кыен. Алма, кәбестә, сарымсак ашарга ярамый, балан, мүк җиләге ашау файдалы.

1 әр стакан күрәгә һәм йөзем, 2 аш кашыгы солы ярмасы, 1 аш кашыгы төелгән чикләвек кирәк. Күрәгә һәм йөземне яхшылап юып, бераз кипшендергәч, коры табада бераз кыздырып алынган солы ярмасы белән бергә иттарткычтан чыгаралар, шарчыклар ясап, чикләвектә әвәлиләр, суыткычка куеп торалар.