"Балтач якташлыгы" бармы ул...

Язлар җитүгә алар матур күлмәкләрен киеп, бизәнеп-ясанып Г.Камал, Тинчурин театрларында уза торган "Якташлар" концертларына җыелып китәләр иде. Буа Арча, Актаныш, Кукмара кызларының ел саен бу көнне көтеп алулары хәтергә уелып калган. Һәр район ел саен очрашу концерты уздыра да алмагандыр, бәлки. Ләкин ул көн шул төбәктән булган егет-кызлар өчен бер горурлык хисе кичерә торган мөһим бер көн иде.

Көн дәвамында аларның кесә телефоннары кызып бетә иде, дисәм дә һич арттыру булмас. Казанның төрле уку йортларында укучы классташларын барлыйлар, дусларын, туганнарын чакыралар... Шулай булмый ни, концерт кына түгел, ә якташлары белән очрашу урыны бит ул. Шунда ук үз районыңнан чыккан күренекле шәхесләрне, артист, җырчыларны да күрә аласың...

Шул елларда күңелгә "Балтачыбыздан артистлар чыкмаган мәллә, Казан сәхнәсенә чыгып җырлардай үзешчәннәр юкмы икәнни?" дигән уйлар килә иде... Мин дә башкалар кебек тулай торак, татфак игъланнары тактасыннан "Балтач якташлыгы" оешмасының концерты була дигән сүзләрне эзли идем. Тик кызганыч, 7 елдан артык башкалада торган елларда мондый игъланга тап булырга насыйп булмады.

Бу хатирәләрне яңартуым юктан гына түгел, күптән түгел Арча якларыннан булган, хәзерге вакытта гаиләсе белән Казанда яшәүче танышымның хәлләрен белешеп алыйм әле дип шалтыраткан идем. Аның ашыга-ашыга "Арча якташлыгы" концертына әзерләнгән вакытына эләктем. Сүземне кыска гына тотып, саубуллаштым. Ә күңелемдә кабаттан ак көнләшү калкып чыкты...

Фото: http://archadk.ru/wp-content/uploads/2016/04/IMG_0731-1024x683.jpg