Балтачта җитәкчеләр үзгәрде, әмма сыйфат яхшы калды (+фоторепортаж)

Зөлфирә Камалованы районыбызда бик күпләр белә. Җаваплы эшләрдә эшләп лаеклы ялга чыккач та күп кенә җәмәгать эшләренең башында тора. Кайберләре буенча бәйгеләрдә дә катнашып җиңүләр яулаганы бар.Тарткан атка - йөк, эшләгән кешегә эш өяләр. Ләкин чама дигән әйбер дә бар бит. Зөлфирә ханым алга таба да активлыгын саклап халыкка хезмәт итү йөзеннән кайбер вазыйфаларын башка иптәшләргә тапшырды. Хәзер Балтач шәһәр җирлегенең ветераннар советын Камил Мөхәрләмов җитәкли. Аның составы тугыз кешедән тора (мин дә шулар арасында). Зөльфирә яңа җитәкчегә вазыйфаларын гына түгел эш өчен кирәк булган, тәртибе белән алып барылган документларны да тапшырды, бай тәҗрибәсе белән дә бик теләп уртаклашты. Алга планнар төзеп Камил әфәнде кул астында эшли башладык.

Ә Балтач Мәдәният үзәге каршында эшләп килүче "Сүнмәс дәрт" клубын җитәкләргә профессиональ белемле, бай тәҗрибәле, үзе дә сәхнә остасы Гадения Зәкиева алынды. Быел бу клубның биш еллык юбилее да билгеләп үтелде. Шушы чагыштырмача кыска гына вакытта коллектив бик күп эшләр белән танылды. Алар куйган концертларны районыбыз авылларында да, башка районнарда да бик яратып карыйлар, заллар тулы була. 15 мартта район Мәдәният үзәгендәюбилей хөрмәтенә куелган концертны клуб эшчәнлеге чорында куелган иң уңышлысы дип санарга була. Анда барысы да кирәк кадәр иде һәм шул ук вакытта бер генә артык әйбер дә булмады. Программа бик төгәл уйланылган "калып"ка салынган иде. Шуңа да аны халык бер тында карады. Оештыручыларга да, чыгыш ясаучыларга да афәрин дип кенә әйтеп була. "Сүнмәс дәрт" клубына быел шактый гына "яшьләр" дә килде һәм бик уңышлы чыгыш ясадылар. Теләге, сәләте булган башкалар да бу клубка килеп үзләренең осталыкларын халыкка күрсәтә алалар.

Юбилей кичәсенең йомгаклау сүзендә Гадения ханым мине үзебезнең фотографыбыз дип таныштырды. Мин бу сүзне кабул итәм - инде ун ел чамасы ветераннар советы һәм "Сүнмәс дәрт" клубы оештырган чаралардан (егермедән артык) бик күп рәсемнәрем бар. Алар барысы да компьютерымда тәртипләп урнаштырылган. Кирәксенгән кешеләргә кәгазъгә дә ясап бирәм, аңа да җиһазлар үземдә. Юбилей кичәсе вакытында урнаштырылган стенд та үземнең архивтан алып мин ясаган рәсемнәрдән төзелгән иде. Ләкин мине бер әйбер борчый. Бу бихисап күп рәсемнәр арасыннан кайчан да булса, кайда да булса кирәклесе чыкмас микән. Алар кайчандыр тарихка әйләнәчәк бит. Берәр электрон саклагычка куюны күздә тотуым.

"Сүнмәс дәрт"леләр кышкы сезонда халыкка хезмәт итсә, җәй җиткәч ял итеп; көч, витаминнар җыеп алдагы сезонга әзерләнәбез. Бездә әле ял итәргә дә, өй тирәсендәге эшләрне башкарырга да энергия кала. Ә ял сезонын инде ачып та җибәрдек - 12 майда Кырлайга барып Габдулла Тукай музеена сәяхәт кылып кайттык. Кайтканда Арчадагы "Казан арты" тарих этнография музеенда да булдык. Сәяхәтне оештыручылар район Мәдәният бүлеге җитәкчесе Илдар Насыйбуллин, мәдәният үзәгенең сәнгать җитәкчесе Наилә Атабаева, автоклуб мөдире Римма Гәрапшина, "Сүнмәс дәрт" клубы җитәкчеләре Гадения Зәкиева белән Зөлфирә Камалова булсалар, культура йорты (җитәкчесе Айрат Хәйруллин)автобусында Марат Шакиров бик җайлап кына йөртеп кайтты. Хәзер, бакчадагы язгы эшләрне тәмамлап, җәйгә тәгаенләп куелган башка эшләрне башкарырга була.Түбәндә - сәяхәттә төшергән рәсемнәрем.

Вагиз Таҗиев.