Бертуган килендәшләр?! (фото)

Ямьле Борнак авылында Гөлбану һәм Мансур Галиәскаровлар гаиләсендә дөняга аваз салган Гөлнара белән Гөлия кечкенәдән бер-берсенә терәк, ярдәмче булып үсәләр. Гөлнара - укытучы, ә сеңлесе дизайнер булырга хыялланса да, киләчәктә икесе дә экономист-бухгалтер белгечлеге ала. Тормышка чыккач та аерылмый аларның юллары. Язмыш кызларны бер-бер артлы Сосна авылына Закировлар нигезенә килен итеп төшерә. Ул чакта аларга бик күпләр сокланып карый. Әле алай гына да түгел, килен булып төшкәч, Гөлнара белән Гөлия бергәләп Сосна мәдәният йортында эшли башлый.

- Мине - директор, ә сеңлем Гөлияне сәнгать җитәкчесе вазифасына эшкә чакыргач, без икеләнеп калдык. Эшләп китә алуыбызга ышанмадык. Әниебез Резеда бик төпле фикерле кеше безнең. "Ризалашыгыз, бергәләп эшләрбез", диде. Ризалаштык. Шул көннән әниебез киңәшчебез дә, беренче тәнкыйтьчебез дә, - ди Гөлнара.

Хуҗәхмәт абый белән лачындай өч егет, бер сылу кыз үстергән Резеда апа сүзендә тора. Кызлары кебек якын күргән киленнәренә эштә генә түгел, тормышта да зур ярдәмче була. Бүгенге көндә Гөлнара белән Илһам Балтачта яши, бер кыз, бер ул үстерәләр. Гөлия белән Илгиз гаиләсендә ике баһадир егет үсеп килә, яңа йорт җиткезеп башка чыкканнар. Гаилә тормышларының бик матур вакытлары - балалар әле кечкенә, аларның куанычлары белән яшәп, алга зур планнар корып, хыялларны чынга ашыруда армый-талмый эшләп, шушы мизгелләрдән ямь һәм тәм табып яшәгән мәлләре.

- Ярый әле килендәшем бертуган сеңлем дип куанам. Шуның кадәр рәхәт. Уртаклашыр серләр, киңәшләшер эшләр бик күп була бит ул килендәшең белән, ә без бер кан бит, бик якын. Рәхмәт әти белән әниебезгә, алар безне кечкенәдән бер-беребез өчен өзелеп торырга өйрәтеп үстерде. Аларның ныклы тәрбиясе тормыш юлында шуның кадәр зур ярдәм. Тормышта бит бу авыр чаклар да була, әмма әти белән әнинең ныклы ярдәме, олы киңәшләре бу авырлыкларны юып алгандай итә, - ди Гөлнара.

- Гөлия, апаң синең олы килендәшең булудан тыш, эшеңдә дә җитәкче бит әле. Авыр түгелме? - дим кызыксынам.

- Киресенчә, мин гомерем буе аның канат астында бик кадерле сеңел булып яшим. Бәхетемә килендәшем дә, эшемдә дә олы терәгем. Аллаһы Тәгалә бик яраткан кешесенә генә мондый олы бүләк ясыйдыр, - ди Гөлия.

Чыннан да, күпме охшашлык, тәңгәллек. Ә эш мәсьәләсендә кызлар эш бүлешми. Кем өлгерә шул башлый, икенчесе дәвам итә. Ә тырышып, булсынга эшләүләре авылдашлары күзалдында. Көн үтсенгә түгел, халык өчен дип эшли алар. Әсмабикә апа заманыннан соң үле бер тынлык кичергән Сосна мәдәният йортына килендәшләр аяк баскач, җан кергән күк булган. Кайсыбер авылларда шимбә-ял көннәрендә дә йозаклы ишекләр каршы алса, Соснада гадәти көндә дә мәдәният йортының тәрәзәләрендә ут яна. Түгәрәккә йөрүчеләр чираттагы репетицияләрен ясый, кайберләре тиздән куеласы спектакльдәге рольләрен кабатлый, кемнәрдер гармунга кушылып җыр суза, икенчеләре дәртле бию көйләренә сәхнәдә ут уйната... Әнә шулай һәр эш көнен матур нотада тәмамлап, гаиләләре янына ашыга килендәшләр, бертуганнар.