"Брайт Паркы" төзүче Казанда техноген һәлакәт китереп чыгарырга мөмкин

«Транснефть-Прикамье» АҖ «Әлмәт-Горький – 3» һәм «Әлмәт-Горький – 2» магистраль нефтьүткәргечләре өстендә уза торган «Брайт Паркы» торак массивы янындагы юл участогы аркасында прокуратурага мөрәҗәгать итәргә ниятли. Компаниядә бу участок буенча зур йөк машиналарының йөрүе торбаүткәргечкә зыян китерергә мөмкин, дип саныйлар. Бу хакта «Татар-информ» МА «Транснефть-Прикамье» компаниясенең баш инженеры урынбасары Эдуард Ишалин сөйләгән.

Ул билгеләп үткәнчә, хәзер магистраль нефть үткәргечнең сак зонасында «Брайт Паркы» торак комплексына даими юл оештырырга тырышалар. Бу юл астында басым  астында 800 һәм 1000 мм диаметрлы торбалар уза.

"Юл ясаган бу участок буенча да зур йөк машиналары, бетоновозлар йөри. Элек бу юл буйлап җиңел машиналар йөри иде, әле ул вакытта ук торак массивны төзүче белән элемтәгә кердек, алар бездән техник шартларны алып юлны көчәйтсеннәр өчен. Әмма узган декабрьдән бирле бу мәсьәлә хәл ителмәгән килеш", - дип билгеләп үтте Ишалин.

Ул, торбаүткәргеч өстеннән куркынычсыз хәрәкәт итү өчен махсус күн каплагыч урнаштыру кирәк, дип өстәде. Торбаларны сакламау куркыныч нәтиҗәләргә китерергә мөмкин.

«Әгәр торба сытыла икән, аннан 55 атмосфера басымы астында нефть бәреп чыгачак», – дип ассызыклады Эдуард Ишалин.

Аның сүзләренә караганда, начар очракта өслеккә 11,4 тоннага кадәр нефть чыгарылырга мөмкин, ул 6,6 гектардан артык мәйданда таркала. Моның өчен «Транснефть-Прикамье» белгечләре 15 июльдә үк юлның проблемалы участогында – бетон блоклар, сигнал лентасы һәм балчык өемнәре куйдылар.

"Әмма икенче көнне үк билгесез затлар чикләү чараларын юкка чыгардылар. Блоклар да, салынган грунт та алынган. Хәзер торба буйлап тагын бетономешалкалар уза, бу 15-20 тонна авырлыктагы автомобильләр. Вакытлы юл зур йөк машиналары өчен магистральгә әверелде", - дип аңлатты Ишалин.

Сөйләшү ахырында ул киләсе атнада ук «Транснефть-Прикамье» АҖ вәкилләренең, хәлне хокук саклау органнары контроленә кую өчен, прокуратурага мөрәҗәгать итәргә ниятләвен билгеләп үтте.

"Чөнки без хәлне башкача үзгәртә алмыйбыз", - дип нәтиҗә ясады Эдуард Ишалин.