Чибәр туташка

Кадерле гүзәл затларыбыз!
Кар өстеннән биеп кенә уздың,
Кайнар табан карны эретте.
Нурлы йөзең, шук карашың белән
Гашыйк иттең ничә егетне.
Әйдә, соклансыннар хәйран калып,
Ак каендай зифа буеңа,
Сиңа нәрсә, үртәп кенә узып,
Әзерләнәсең бит туеңа.
Сайлаганың имән кебек таза
Ышанычлы тамыр җибәргән.
Фәкать аңа тугры булып калсаң
Саклар сине ачы җилләрдән.
Көнкүрештә кайчан буран чыгар,
Саф җилләргә иркен юл ачып,
Хисләр ныгыр, ачу таратырдай
Назлы булса, якты карашың.
Сынауларны уза алмаганда
Мәхәббәт ул бик тиз сүрелә.
Күңел җылың тартып тора алса
Куанычлар алдан йөгерә.
Кар эретер эчке ялкын белән
Яраталсаң сөйгән ярыңны,
Икегезгә уртак, тансык булган
Бәхет йолдызлары кабыныр.

im1-tub-ru