"Чисталык икеайлыгы" башланды, ә объектлар янында тәртип юк...

Район башкарма комитеты җитәкчесе, районның административ чисталык комиссиясе рәисе Рамил Шакиров: "Иң беренче чиратта, оешма-учреждение яннары һәм халык күп йөри торган урыннар тәртиптә булырга тиеш!", дип катгый кисәтүләр ясауга карамастан, чисталык мәсьәләсенә җитди карамаган оешма җитәкчеләре дә бар әле.

"Шимбә-ял көннәрендә район үзәгендә һәм авылларда массакүләм спорт һәм мәдәни чаралар оештырылды. Дөрес, бәйрәм чарасы программасына, ярышларның барышына карата артык зур кимчелекләр юк, ә менә бу чаралар уза торган объектларның керү-чыгу юлларын, сукмаклардагы җыелган сулыкларны, каткан бозларны, чүп-чарларны җыештырырга, алдан ук өмә ясап, тәртипкә китерергә була бит... Быел экология елы - бу мәсьәләгә аеруча зур әһәмият биреләчәк!" дип басым ясады.

Узган шимбәдә "Хыял" яшьләр үзәгендә район җитәкчелеге югарылыгында, "Кызыл юл" авыл хуҗалыгы җәмгыяте призына нинди матур, оста оештырылган көрәш ярышы узды. Ә бинага керә торган юлның чисталыгы игътибар үзәгеннән "төшеп калган". Шулай ук Яңгул мәктәбенә карата да, кисәтү зур булды. Кунаклар каршы алганда, территориядә тәртип, чисталык булу - бик мөһим.