Чистай районында өстенә кар ишелеп 15 яшьлек үсмер һәлак булган

(Казан, 5 февраль, “Татар-информ”). Чистай районы Данауровка авылында яр кырыенда уйнаганда өстенә кар ишелеп, 15 яшьлек үсмер һәлак булган. Бу хакта Чистай муниципаль районының башкарма комитеты җитәкчесе Эдуард Хәсәнов хәбәр итә.

Россия Гадәттән тыш хәлләр министрлыгының Татарстан буенча Баш идарәсе матбугат хезмәте мәгълүматлары буенча, 112 ашыгыч хезмәте номерына 12 сәгать 43 минутта чокыр тирәсендә уйнаган дүрт баланың берсе чокыр төбенә төшеп китүе турында хәбәр алынган. Ир бала артыннан кар йомгагы тәгәрәп, аны каплап киткән. Малайларның икесе аның артыннан төшеп казый башлаган, өченчесе авылга ярдщм артыннан йөгергән.

“Татар-информ”га Эдуард Хәсәнов сөйләвенчә, 12 сәгат 43 минутта чакырылган “Ашыгыч ярдәм” машинасы медиклары 13 сәгать 1 минутта килгән. Аңа кадәр авыл фельдшеры килгән. Малай тирән кар астында калган булган, аның гомерен саклап кала алмаганнар.

Медиклар 15 яшьлек ир баланың үлемен раслаган.