«Даур куара» музей ӝоген выльдӥськоз

Со вожвылъяськонэ ёросысьтымы школаос но пыриськизы. Ньылез соос пӧлысь  — Балтась гимназия, Шор Кушкет шоръёзо школа, Салаусь троспрофильем лицей но Арборысь нылпи сад — вормисьёс пӧлы шедизы но быдэн 500 сюрс манет грант утӥзы. Та сярысь Шор Кушкет школаысь удмурт кылъя но литературая дышетӥсь Олеся Яковлева ивортӥз.

— Конкурсэ пыриськон понна проектлы темазэ кема ӧм утчалэ — музеямы туж трос экспонатъёс люкамын. Василий Петрович Никитинлэн тыршеменыз кылдытэм музейын информация шедьтыны луоз аспалмы, удмурт гожъяськись Николай Никифоров сярысь но, Россиысь Герой Олег Исаев сярысь но; удмурт калыклэн ужан но юртъер котырын кутӥськем вашкала арбериосыз но татын вань. Озьыен, «Модернизация школьного краеведческого музея «Даур куара» шуыса нимаськись проектэз дасяса янгышаськымтэмы — конкурсын вормем 100 школаос пӧлы ми но шедимы (огъя та конкурсэ 121 школа пыриськиз), — шуиз Олеся Васильевна. 

Дышетӥсьлэн верамезъя, грантэз утонын дышетӥсьёслэн но, нылпиослэн но, анай-атайёслэн но люкетсы бадӟым. Утэм 500 сюрс манетэз Шор Кушкет школаын ужасьёс музеез выльдон понна кутыны малпало. 2022-тӥ арын шуркынмон толэзёзь проектын возьматэм ужъёс быдэстэмын луыны кулэ ини.