Елена Кислая: «Малпамтэ шорысь быръем ӧнере вань улонме воштӥз»

Висисьёсты котьку пальпотыса пумитась, умой кылын гинэ вазись, ас ужзэ ӟеч быдэсъясь медсестра вал со. Лыдъяса быдтонтэм адями солы нылпиоссэ эмъяны оскиз. Кылкутӥсь ужасен, лад-лад но радызъя, огшоры кылын ваньзэ валэктыны быгатӥсь эмсузэрен тодо сое ципьяос, озьы ик мукет матысь гуртъёсын улӥсь калык но. Лена апай доры (матын карыса гажамон эмсузэрлы озьы вазисько) интервью басьтыны мынон азьын кема малпай, кыӵегес пӧрмоз вераськонмы шуыса. Дасям юанъёсме но олокӧня пол вошъяй, тупатъяй, бератаз озьы но вераськонмы ас эрказ, но туж тунсыко но шуныт пӧрмиз. Лена апаез воксё мукет паласен адӟи. Со ас ужезлы сётскыса ужась медсестра гинэ луымтэ вылэм — усто вераськись, умой кылзӥськись, ӟеч кузё кышно но вылэм.
Чебер но чылкыт юртаз куно карыса, Лена апай ачиз сярысь веранзэ кутскиз.
— Пичи дырысеным педагогической визьнод басьтэме потэ вал, со сярысь гинэ малпаськи. Но конкурсъя малпам интые пырыны ӧй быгаты. Соин, одӥг арез ыштонтэм понна, Ижкарысь Пушиналэсь нимзэ нуллӥсь медициная училищее пырыны, та удысын асме утьыны малпай. Пыри ведь. Дышетски. Собере пенсие потытозям но эмсузэр луыса ужай. Ноку но ӧй жаля та удысэз быръемелы. Озьы но луэ вылэм со — огшоры гинэ быръем удысын гумыры ӵоже ужме вань сюлмысен яратыса ужай. Улон — паймымон маке, — вера Елена Анатольевна пальпотыса.
Елена Кислаяен интервьез пыр-поч «Азьлане» газетысь лыдӟыны быгатӥськоды.