Февраль уртасында кемнәргә бәхет елмаер?

Нәкъ февральдә Венера Кучкар билгесенә керә, димәк, Кучкарга язмыштан матур бүләкләр көтәргә кирәк. Бу аеруча шәхси тормышка кагыла. Ялгыз Кучкарлар тормышларын мәгънә белән тутырачак кешеләрен очратыр. Ә парлыларның мөнәсәбәтләренә гармония өстәлер.

Игезәкләр ашыга да ашыга. Тәмам арыды алар. Ял һәм тынычлану кирәк. Февральдә моңа форсат чыгар. Бетмәс эшләрдән котылып, вакытны үзләренә багышлый алырлар. Иң мөһиме - бу вакытта өстенлекләрне дөрес билгели белергә кирәк.

Кыз билгесендә туганнар акчага күмелергә әзер булсын. Соңгы арада аларның уйлары гел җитмәгән акчалар турында булды. Ниһаять, бу уйлар онытылачак. Февральдә яңа эшкә урнашкан Кызлар, лаеклы хезмәт хакы алып, шатланып эшләячәк.

Бизмәнне романтика, мәхәббәт маҗаралары көтә. Әгәр парлы Бизмән моңа кадәр хәләле белән гел мөнәсәбәтләр ачыклап яшәгән булса, февральдә талашулар, аңлашылмаучанлыклар тукталачак. Нәрсәнең әһәмиятле икәнен аңлап, Бизмән компромисска бара белергә өйрәнәчәк.

Чаянга эшләнеп бетмәгән мөһим эшләре турында уйларга кирәк. Чөнки тиздән алар тагын да күбәячәк. Ләкин мәшәкатьләр бик күңелле булмакчы! Яңа танышулар, яңа дуслар, ә, бәлки, яңа эш тә булыр. Тормышыгыздагы зур үзгәрешләргә әзер булыгыз!

Фото: depositphotos

Автор: Ләйсән Якупова