Гадәти чишмә суы изге була аламы?

Крутушкада санаторийдә ял иткәндә безне Раифа монастырена экскурсиягә алып барганнар иде. Анда чишмә суының бик көчле булып агып утырганын күргән идек.

Без кереп йөри торган кибеттә 10лап төрле су бар икән. Шулар арасында үзебезнеке дигәне бердәнбер «Мензелинский» гына һәм ул иң арзанлысы да — литр ярымы 32 сум.

Элеккеге елларда барлык кибетләрдә дә үзебезнең «Шифалы су»ы­быз сатуда булса, хәзер анысы да бик күренми бугай. Тархан, Хөтнә сулары да күренмәде мин караган кибетләрдә. «Вол­жанка», «Святой ис­точник», «Славянская» дип аталган суларның литры 36 сумга кадәр кү­тәрелгән. Ничек аталуларына карамастан, алары да шул ук чишмә сулары бит инде. Соңгы икесенең исемнәрен каян алып куй­ганнардыр, суның дине дә, милләте дә юк бит инде, югыйсә. Раифа суы кебек аның болары да чукындырылган булса, без мөселманнарга аларны эчү хәрам була түгелме?

Кибетләрдә сатылучы иң арзан дигән суның да авыл халкыннан сатып алынган сөт бәясеннән кыйммәт булуы бернинди мантыйкка сыймый. Авыл кешесе сыерын көне-төне карап, иза чигеп савып алган бер литр сөтнең бәясе агып торган чиш­мәдән тутырып алган су бәясеннән арзанрак булуын ничек аңларга? Кибетләрдә бер литр сөт 50-60 сум, ә Раифа суының яр­ты литры 14 сум 29 тиен.

Авыл халкы иң карусыз булгач, аларны гомер буе ничек талаган булсалар, әле дә шулай дәвам итә­ләр. Малларын, хәллерәкләренең йортларын да талап алып, хезмәт хакы түләми торган «колхоз» дип аталган коллар оешмасы ясап, алар әле күп еллардан соң гына адәм рәтенә кереп, эш ке­ше­сенә акча түли баш­лагач, ул колхозларны талап, таркатып, колхозчыларны эшсез калдырып, авылларны бетү чигенә китереп җиткерделәр...

Акыл һәм гаделлек белән яши торган көннәр килсен иде инде.

Рәфкать ИБРАҺИМОВ. Казан.

Чыганак: Татарстан яшьләре