Гаиләләр бәхетле һәм тату булсын!

Балтачыбызда бәхетле һәм үрнәк гаиләләр бик күп, алар районыбыз горурлыгы, туган ягыбызның йөз аклыгы. ЗАГС бүлегеннән алынган мәгълүматлар буенча районыбызда 10 меңнән артык гаилә исәпләнә. Агымдагы елның 6 аена 49 пар гаилә корган.

Гаилә, мәхәббәт һәм тугрылык көнендә никахларын кимендә 25 ел элек теркәткән, бер-берсен яратуга, тугрылыкка корылган гаиләләренең ныклыгы белән танылган, уртак хезмәт нәтиҗәсендә муллыкка ирешкән, балаларын җәмгыятьнең лаеклы әгъзалары итеп тәрбияләгән ир һәм хатынга «Мәхәббәт һәм тугрылык өчен» дип аталган медаль бирелә. Балтачта әлеге  медальгә 13 гаилә лаек булган. Быел исә медаль Нөнәгәр авылында яшәүче Җүәйрә һәм Гыйльметдин Хәбибуллиннарга бирелде.

Гаилә, мәхәббәт һәм тугрылык көнендә һәр гаиләгә тигезлек, тынычлык, муллык, сәламәтлек, бәхет һәм мәхәббәт телибез. Илләр имин, гаиләләр нык булсын. Безнең һәрберебез өчен бу көн якыннарыбызга, туганнарыбызга, әти-әниләр һәм балаларыбызга хөрмәт күрсәтү, игътибар бирү, үзеңне чиксез бәхетле гаилә итеп тояр өчен яхшы сәбәп булуын телибез.