“Хезмәт” газетасы бәясеннән тормыйча, гел чыгып торсын!

Газета буенча фикерләрне гомумиләштереп алганда алар уңай. Авыл хуҗалыгы тармагы буенча язмаларны зур кызыксыну белән укыйм. Гади хезмәт кешесен тагын да күбрәк зурласаң да артык булмастыр. Элекке җитәкчеләр турындагы язмаларны да арттыру кирәктер. (Шактый өлкәннәре дә бар, исән чакта үзләре укырлык итеп.) Мәдәният мәсьәләсе нык аксап бара кебек... Мәдәният йорты эшчәнлеге, авыл клублары даими контрольгә алынамы, үзешчән сәнгать югалып бармыймы? "Без көрәшле халык" рубрикасы астында күпме батырларыбыз белән таныштырып булыр иде.

Мөмкин булганча хакимият эшчәнлеген дә киңрәк яктыртырга кирәктер (Күбрәк имеш-мимешләр белән кызыксынмас өчен). Сөт бәяләре, хезмәткә түләү мәсьәләләре һәрдаим яктыртылсын. Авыллар тарихын дәвам итеп районның һәр авылын "урап" чыксагыз иде.

Фидаил Хәйруллин,
Карадуган авылы.